شمالی وزیرستان: میر علی بازار میں سیکورٹی فورسز کی گاڑی پر فائرنگ، 2 اہلکار شدید زخمی

میرانشاہ (نمائندہ ڈیلی اردو/ٹی این این) صوبہ خیبر پختونخوا کے قبائلی شمالی وزیرستان میں سیکویرٹی فورسز پر نامعلوم افراد کی جانب سے حملے میں دو اہلکار زخمی ہو گئے۔

ذرائع کے مطابق میر علی بازار میں معمول کی گشت پر مامور سیکیورٹی فورسز کی گاڑی پر نامعلوم افراد نے فائرنگ کی جس کے نتیجے میں 2 اہلکار شدید زخمی ہو گئے۔

سرکاری ذرائع کے مطابق زخمیوں میں حولدار خورشید اور سپاہی عبداللہ شامل ہیں، زخمیوں کو علاج کے لیے مقامی ہسپتال منتقل کیا گیا جہاں ایک اہلکار کی حالت تشویشناک بتائی جاتی ہے۔

وقوعہ کے بعد سیکورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

گزشتہ روز شمالی وزیرستان کے علاقے دتہ خیل میں ٹرخی چیک پوسٹ پر حملے میں سیکورٹی فورسز کے دو اہلکار ہلاک ہوگئے تھے۔

یاد رہے کہ چار روز قبل صوبائی حکومت پشاور میں ایک ٹارگٹڈ آپریشن کے دوران 2 پولیس اہلکار ہلاک ہوئے تھے۔