شمالی وزیرستان میں جمعیت علما اسلام کے رہنما اور پولیس افسر کی ٹارگٹ کلنگ

میرانشاہ (ڈیلی اردو) صوبہ خیبرپختونخوا کے قبائلی ضلع شمالی وزیرستان میں فائرنگ کے علیحدہ علیحدہ واقعات میں جمعیت علما اسلام کے اہم رہنما اور پولیس اہلکار ہلاک ہوگئے ہیں۔

تفصیلات کے مطابق قبائلی ضلع شمالی وزیرستان کے علاقے میران شاہ کے پاکستان بازاز کے قریب نامعلوم افراد نے جمعیت علمااسلام کے رہنماء، عالم دین اور ویلیج کونسل کے چیئرمین مولانا نور اسلام نظامی کو ٹارگٹ کلنگ کا نشانہ بنایا۔

ڈی پی او شمالی وزیرستان نے بتایا کہ نور اسلامی نظامی گولیاں لگنے سے موقع پر ہی ہلاک گئے جن کی لاش کو میران شاہ ہسپتال منتقل کردیا گیا ہے۔

انہوں نے بتایا کہ وقوعہ سے شواہد اکھٹے کرلیے گئے ہیں جبکہ ملزمان کی گرفتاری کے لیے داخلی اور خارجی راستوں پر سخت چیکنگ کی جارہی ہے۔

پولیس کے مطابق دوسرا واقعہ تحصیل میرعلی کے نواحی گاؤں حسوخیل میں پیش آیا جہاں پولیس کے سب انسپکٹر ملک سمیع اللہ داوڑ کو نامعلوم مسلح افراد نے فائرنگ کرکے موت کے گھاٹ اتار دیا ۔

شمالی وزیرستان پولیس نے دونوں لاشوں کو میرعلی اور میرانشاہ ہسپتال منتقل کر کے تحقیقات شروع کر دی۔