شمالی وزیرستان میں دھماکا، بم ڈسپوزل یونٹ کے دو اہلکار ہلاک، دو زخمی

میرانشاہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان کے علاقے دتہ خیل میں بارودی مواد ناکارہ بنانے والی ٹیم کے اہلکاروں پر اس وقت حملہ ہوا جب ایک دیسی ساختہ بم (آئی ای ڈی) زور دار دھماکے سے پھٹ گیا۔

سیکیورٹی ذرائع کے مطابق دھماکے کے نتیجے میں بم ڈسپوزل یونٹ کے دو اہلکار ہلاک ہوگئے، جو علاقے میں کلیئرنس آپریشن میں مصروف تھے۔

ذرائع کا کہنا ہے کہ واقعے میں دو دیگر سیکیورٹی اہلکار زخمی بھی ہوئے ہیں، جن میں سے ایک کی حالت تشویشناک بتائی جا رہی ہے۔ زخمیوں کو فوری طور پر قریبی طبی مرکز منتقل کر دیا گیا۔

حکام کے مطابق دھماکہ اس وقت ہوا جب ٹیم علاقے میں موجود بارودی مواد کو ناکارہ بنانے کی کارروائی کر رہی تھی۔

واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ حملے کی نوعیت اور ذمہ داروں کے تعین کے لیے تحقیقات جاری ہیں۔