شمالی وزیرستان میں سیکیورٹی فورسز کا آپریشن، تحریک طالبان پاکستان کے دو دہشت گرد ہلاک

راولپنڈی (کاشف محمود) سیکیورٹی فورسز نے قبائلی ضلع شمالی وزیرستان میں آپریشن کے دوران کالعدم تنظیم تحریک طالبان پاکستان کے دو دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان میں دہشتگردوں کی موجودگی کی اطلاع پر آپریشن کیا۔ آپریشن کے دوران فائرنگ کے تبادلے میں 2 دہشت گرد ہلاک کر دیے گئے اور ایک افسر اور جوان زخمی ہوا۔

خیال رہے کہ گزشتہ روز شمالی وزیرستان کے علاقے گھڑیوم میں فوجی چوکی پر دہشت گردوں نے فائرنگ کی تھی جس پر سیکورٹی اہلکاروں کی جانب سے فوری اور بھرپور جوابی کارروائی کی گئی۔ فائرنگ کے تبادلے میں 37 سالہ رہائشی نائیک غلام مصطفیٰ شہید ہو گئے تھے اور وہ مظفرآباد کے رہائشی تھے۔

دہشت گردوں سے ہونے والے فائرنگ کے تبادلے میں ہلاک ہونے والے پاک فوج کے نائیک غلام مصطفیٰ کو پورے فوجی اعزاز کے ساتھ سپرد خاک کر دیا گیا۔

نائیک غلام مصطفیٰ کی تدفین ان کے آبائی علاقے دونہ چھتر، مظفرآباد میں کی گئی۔ نائیک کی اس سے قبل نماز جنازہ ادا کی گئی جس میں عزیز و اقارب اور اہل علاقہ کی بہت بڑی تعداد نے شرکت کی۔