شمالی وزیرستان میں ڈی پی او کے قافلے پر دہشت گردوں کا حملہ، ایک پولیس اہلکار ہلاک، دو زخمی

اسلام آباد (ش ح ط) صوبہ خیبر پختونخوا کے ضلع شمالی وزیرستان میں ڈی پی او کے قافلے پر فائرنگ سے ایک پولیس اہلکار ہلاک جبکہ دو زخمی ہوگئے۔

تفصیلات کے مطابق شمالی وزیرستان کی تحصیل میرعلی کے مین بازار میں دہشت گردوں نے ڈسٹرکٹ پولیس افسر شمالی وزیرستان (ڈی پی او) عقیق حسین کے قافلے پر حملہ کیا۔ حملے میں ڈی پی او محفوظ رہے تاہم ایک پولیس اہلکار ہلاک اور دو زخمی ہوئے۔

https://twitter.com/ShabbirTuri/status/1483138355768397824?t=romht3uHa3N4GoSRGsS10Q&s=19

مقامی پولیس کا کہنا ہے کہ گزشتہ روز تھانہ میرعلی کی حدود میں واقع گاؤں، ہرمز میں نامعلوم افراد نے بنوں کیمپ سے میران شاہ جانے والی پولیس کی گاڑی پر فائرنگ کی۔ دونوں طرف سے فائرنگ کا تبادلہ ہوا جس میں ایک پولیس کانسٹیبل امین اللہ ہلاک جبکہ دو پولیس کانسٹیبلز نیک زمان اور واسد زخمی ہو گئے۔

واقعے کے بعد ڈی پی او کی سربراہی میں ہرمز میں پولیس سرچ اینڈ سٹرائیک آپریشن رات گئے تک جاری رہا۔ پولیس کے مطابق آپریشن کے دوران کالعدم تنظیم تحریک طالبان پاکستان کے دو دہشت گرد مارے گئے۔

دوسری جانب حملے کی ذمہ داری تحریک طالبان پاکستان کے ترجمان محمد خراسانی نے قبول کی۔