شکارپور: مسجد میں فائرنگ، پیش امام سمیت 3 افراد ہلاک

شکارپور (ڈیلی اردو) صوبہ سندھ کے ضلع شکارپور میں مسجد میں اندھا دھند فائرنگ کے نتیجے میں مسجد کے امام سمیت تین افراد ہلاک ہوگئے۔

تفصیلات کے مطابق شکار پور کے علاقے گڑھی یاسین کے قریب گوٹھ حبیب جکھرو میں مسجد میں فائرنگ ہوئی جس کے نتیجے میں مسجد کے پیش امام سمیت 3 افراد ہلاک ہوگئے۔

واقعہ کی اطلاع ملتے ہی پولیس اور دیگر قانون نافذ کرنے والے ادارے جائے وقوعہ پر پہنچ گئے اور لاشوں کو قریبی ہسپتال منتقل کردیا گیا۔

پولیس نے بتایا کہ مسجد میں فائرنگ کے نتیجے میں 3 افراد ہلاک ہوئے ہیں، جن کی شناخت پیش امام ارشاد منگرانی، دلشاد اور شمن کے ناموں سے ہوئی ہے۔

پولیس کے مطابق فائرنگ کا واقعہ پرانی دشمنی کا شاخسانہ لگتا ہے تاہم تحقیقات کے بعد ہی حتمی نتیجہ اخذ کیا جاسکتا ہے۔

واقعے کے بعد پولیس نے ملزمان کی تلاش شروع کردی ہے لیکن تاحال کسی ملزم کی گرفتاری کی اطلاع نہیں ملی ہے۔