شہباز شریف کا افغانستان کو انتباہ:"پاکستان یا خارجیوں میں سے کسی ایک کا ساتھ دو"

بنوں (ڈیلی اردو) وزیراعظم شہباز شریف نے دہشت گردی کے خاتمے کے حوالے سے افغانستان کی عبوری حکومت کو ایک بار پھر سخت پیغام دیتے ہوئے کہا ہے کہ “افغانستان کو پیغام دینا چاہتا ہوں کہ خارجیوں یا پاکستان میں سے ایک کا انتخاب کر لیں۔”

وزیراعظم نے یہ بات فیلڈ مارشل عاصم منیر کے ہمراہ بنوں کے سی ایم ایچ ہسپتال میں دہشت گردی کے واقعات میں زخمی فوجی جوانوں کی عیادت کے بعد میڈیا سے گفتگو کرتے ہوئے کہی۔

شہباز شریف نے کہا کہ پاکستان میں حالیہ دہشت گردی کے بیشتر واقعات میں افغان باشندے ملوث پائے گئے ہیں، جو سرحد پار سے آ کر کالعدم تحریک طالبان پاکستان (جسے حکام "فتنہ الخوارج" قرار دیتے ہیں) کے ساتھ مل کر کارروائیاں کرتے ہیں۔

ان کا کہنا تھا کہ اگر افغانستان کی عبوری حکومت پاکستان کے ساتھ تعلقات قائم رکھنا چاہتی ہے تو “ایمانداری اور سچائی کے ساتھ تعلقات قائم کرے، جس کے لیے ہم تیار ہیں۔ تاہم اگر وہ دہشت گردوں کا ساتھ دینا چاہتی ہے تو پھر ہمیں بھی کابل انتظامیہ سے کوئی واسطہ نہیں ہوگا۔”

وزیراعظم نے دعویٰ کیا کہ پاکستان کی مسلح افواج فیلڈ مارشل عاصم منیر کی سربراہی میں ہر صورت دہشت گردوں کا خاتمہ کریں گی۔ ان کے مطابق دہشت گردی کے خلاف مزید مؤثر اقدامات کے لیے جو بھی انتظامی اور قانونی فیصلے درکار ہوں گے، فوری طور پر کیے جائیں گے۔

ان کا مزید کہنا تھا کہ “پاکستان کے بہترین مفاد میں فیصلے کریں گے، کابینہ میں ان پر بحث کے بعد حتمی فیصلہ لے کر فوری عملدرآمد کیا جائے گا۔”

‏پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کیلئے خوارج کی اصطلاح استعمال کرتا ہے۔