صومالی فوج کی کارروائی میں الشباب کے 15 دہشت گرد ہلاک

موغادیشو (ڈیلی اردو/شِنہوا) صومالیہ کے وسطی علاقے ہیران کے قصبے بولوبورد کے قریبی علاقے افکاد میں صومالی نیشنل آرمی(ایس این اے) کی ایک خصوصی کارروائی کے دوران الشباب کے 15 دہشت گرد ہلاک جبکہ درجنوں دیگر زخمی ہو گئے ہیں۔

ایس این اے سیکٹر 27 کے کمانڈر احمد محمد تریدیشو نے جمعرات کی صبح ریڈیو موغادیشو کو بتایا کہ کارروائی کے دوران فوجیوں نے دہشتگردوں کے ٹھکانوں کو بھی تباہ کر دیا ہے۔

تریدیشو نے بتایا کہ آج صبح سویرے بولوبورد کے نزدیک افکاد کے مقام پر بہترین منصوبہ بندی کے ساتھ کی جانیوالی ایک کارروائی میں ہم نے الشباب کے 15 دہشت گرد کو ہلاک اور دیگر کو زخمی کر دیا ہے، کارروائی میں انکے ٹھکانے بھی تباہ کر دیئے گئے ہیں۔

انہوں نے مزید کہا کہ آپریشن تب تک جاری رہے گا جب تک فوج ہیران میں دہشت گرد گروہ کے ماتحت تمام علاقوں کو آزاد نہیں کرا لیتی۔