عاصم منیر کے ہمراہ شاہ عبد اللہ دوم کا جی آئی ڈی ایس سینٹر اور ٹلہ فیلڈ فائرنگ رینج کا معائنہ

راولپنڈی (ڈیلی اردو /اے پی پی)  اردن کے شاہ عبداللہ دوم نے اتوار کے روز گلوبل انڈسٹریل اینڈ ڈیفنس سلوشنز (جی آئی ڈی ایس) سینٹر کا دورہ کیا جہاں چیف آف آرمی سٹاف فیلڈ مارشل سید عاصم منیرنے ان کا استقبال کیا۔

سرکاری خبر رساں ادارے اے پی پی نے پاکستانی فوج کے شعبہ تعلقات عامہ (آئی ایس پی آر) کے حوالے سے بتایا ہے کہ دورے کے دوران شاہ اردن کو جی آئی ڈی ایس کی ساخت، صلاحیتوں اور ادارے کی جانب سے تیار کی جانے والی مصنوعات کے بارے میں جامع بریفنگ دی گئی جس میں پاکستان کی مقامی دفاعی پیداوار، تکنیکی جدت جبکہ پاکستان اور اردن کے درمیان دوطرفہ دفاعی تعاون کے ممکنہ مواقع پر پیشرفت کو اجاگر کیا گیا۔

بعد ازاں شاہ عبداللہ نے ٹلہ فیلڈ فائرنگ رینج کا بھی دورہ کیا۔ 

اس موقع پر پاکستان کے وزیرِ اعظم شہباز شریف اور آذربائیجان کے وزیر دفاعی صنعت وُوگر ویلہ اوغلو مصطفائیف بھی موجود تھے۔

شاہ اردن اور دیگر مہمانوں نے ایک مشترکہ فائر اینڈ مینیور مشق کا بھی مشاہدہ کیا جس میں روایتی اور فضائی فائر پاور، ہم آہنگ حرکات اور سپیکٹرم وارفیئر کی صلاحیتوں کا مظاہرہ کیا گیا۔ مشق کے دوران مختلف انواع اور کثیرالمقاصد ڈرونز کا بھی عملی مظاہرہ کیا گیا۔

اس موقع پر وزیراعظم شہباز شریف کا کہنا تھا کہ شاہ عبداللہ کا یہ دورہ دونوں ممالک کے درمیان پائیدار دوستی، باہمی اعتماد اور امن و ترقی کے مشترکہ جذبے کی عکاسی کرتا ہے۔

فیلڈ مارشل عاصم منیر نے پاکستان اور اردن کے درمیان مضبوط دفاعی شراکت داری پر زور دیتے ہوئے اردن کے ساتھ فوجی تعاون مزید بڑھانے، مستحکم اور پرامن خطے کے باہمی وژن کو مشترکہ طور پر حاصل کرنے کے پاکستان کے عزم کی تجدید کی۔