عراق: بغداد میں امریکی فضائی اڈے پر ڈرونز اور راکٹ حملے

بغداد (ڈیلی اردو) عراق کے دارالحکومت بغداد میں انٹرنیشنل ایئرپورٹ سے متصل امریکی فوجی اڈے پر دو ایسے ڈرونز داغے گئے جن پر ’قائد قاسم سلیمانی کا انتقام‘ لکھا ہوا تھا جب کہ 4 راکٹس بھی مارے گئے۔

عالمی خبر رساں ادارے کے مطابق بغداد کے عالمی ہوائی اڈے پر امریکی فوجیوں کے زیر استعمال حصے میں دو ڈرونز اور 4 راکٹس سے حملہ کیا گیا جس کے بعد سائرن کی آوازیں گونجنے لگیں اور جوابی کارروائی کے لیے اتحادی فواج کے ہیلی کاپٹرز نے فضا میں گشت شروع کردیا۔

ڈرونز اور راکٹ حملے سے امریکی فوجی اڈے کی عمارت کو معمولی نقصان پہنچا۔ حملے کے وقت درجنوں امریکی فوجی اہلکار موجود تھے تاہم کوئی کوئی جانی نقصان نہیں ہوا۔ ڈرونز پر ’’قائد قاسم سلیمانی کا انتقام‘‘ لکھا ہوا تھا۔

دوسری جانب اس حملے سے سوشل میڈیا پر وائرل ہونے والی ویڈیو میں ایران کے حمایت یافتہ مسلح تنظیم “ابابیل بریگیڈز” کے جنگجوؤں کو امریکی اڈے پر ڈرون حملے کی تیاری کرتے دکھایا گیا ہے جب کہ وہ آپس میں گفتگو کے دوران حملے کو قاسم سلیمانی کا انتقام قرار دے رہے تھے۔

#سرايا_ابابيل تنشر فيديو لعملية استهداف قاعدة فيكتوريا قرب مطار بغداد بالطائرات المسيرة #لن_نبقيهم #صفعات_الثائرين #يد_القصاص pic.twitter.com/QS3y9yMAz0

— سومري #313 (@S22_313) January 7, 2022

عراقی میڈیا کے مطابق ڈرونز کو جوابی کارروائی میں دفاع نظام نے مار گرایا تاہم 4 راکٹس امریکی فوجی اڈے کے احاطے میں گرے جس سے معمولی نقصان ہوا ہے۔

ایران کی حمایت یافتہ تنظیم “ابابیل بریگیڈز” نے دعویٰ کیا ہے کہ ڈرونز اور راکٹس حملے پاسداران انقلاب کی قدس فورس کے سربراہ جنرل قاسم سلیمانی اور پاپولر موبیلائزیشن فورسز کے نائب سربراہ ابو مہدی المہندس کے امریکی حملے میں قتل کی دوسری برسی کے موقع پر انتقاماً کیے گئے۔