غزہ میں اسرائیلی حملوں میں عورتوں اور بچوں سمیت 80 فلسطینی ہلاک، 7 لاکھ افراد کی نقل مکانی

غزہ (ڈیلی اردو/اے ایف پی/ڈی پی اے) مقامی ہسپتالوں کے مطابق بدھ کے روز اسرائیلی فضائی اور زمینی حملوں میں کم از کم 80 فلسطینی ہلاک ہو گئے ہیں، جن میں بڑی تعداد عورتوں اور بچوں کی ہے۔ سب سے زیادہ جانی نقصان غزہ شہر میں رپورٹ کیا گیا ہے۔

فراس مارکیٹ کے قریب قیامت خیز حملہ

ہنگامی امدادی اداروں نے بتایا کہ غزہ شہر کے علاقے دراج میں فراس مارکیٹ کے قریب بے گھر پناہ گزینوں کی عمارت اور خیموں پر حملے میں کم از کم 20 افراد جاں بحق ہوئے۔ ہلاک شدگان میں خواتین اور بچے بھی شامل ہیں۔

حماس کے زیرانتظام سول ڈیفنس ایجنسی کے مطابق ہلاک ہونے والوں میں چھ خواتین اور نو بچے شامل ہیں۔ یہ حملہ اس گودام پر کیا گیا جہاں بے گھر افراد نے پناہ لے رکھی تھی۔

“جسم ٹکڑے ٹکڑے ہو گئے تھے”

حملے میں اپنے رشتہ دار کھونے والے محمد حجاج نے خبر رساں ادارے اے ایف پی کو بتایا: "یہ عمارت اس وقت بمباری کا نشانہ بنی جب لوگ سو رہے تھے۔ جب ہم پہنچے تو بچوں اور عورتوں کے جسم ٹکڑے ٹکڑے تھے۔" ایک خاتون نے کہا کہ مرنے والوں میں اس کی بہن کا شوہر، دو بچے اور سسر بھی شامل ہیں۔

اسرائیلی فوج کا موقف

اسرائیلی فوج نے دعویٰ کیا کہ حملے میں حماس کے دو جنگجو نشانہ بنائے گئے تھے اور ہلاکتوں کی تعداد ان کے پاس موجود معلومات سے مطابقت نہیں رکھتی۔ فوجی ترجمان نے مزید کہا کہ انہیں فلسطینی دعوؤں سے آگاہی ہے مگر ان کے پاس دستیاب معلومات مختلف ہیں۔

مزید جھڑپیں

بدھ کی سہ پہر غزہ کے ہسپتالوں کو مزید 60 لاشیں موصول ہوئیں جو اسرائیلی حملوں اور فائرنگ میں ہلاک ہوئے تھے۔ عینی شاہدین نے بتایا کہ اسرائیلی ٹینک غزہ شہر کے جنوب مغربی علاقے تل الحوا اور شمال مغرب کے رمل علاقے میں دیکھے گئے ہیں۔

غزہ سٹی سے 7 لاکھ سے زائد فلسطینیوں کی نقل مکانی

اسرائیلی فوج نے جمعرات کو اعلان کیا کہ اگست کے آخر سے اب تک غزہ سٹی سے سات لاکھ فلسطینی جنوبی علاقوں کی طرف منتقل ہو چکے ہیں، جبکہ شہر پر اسرائیل کے فضائی اور زمینی حملوں کی شدت میں اضافہ ہو رہا ہے۔ 

دوسری جانب اقوام متحدہ کی امدادی ایجنسی اوچا (او سی ایچ اے) نے جمعرات کو بتایا کہ اگست کے وسط سے اب تک نقل مکانی کے تین لاکھ 88 ہزار واقعات درج کیے گئے ہیں، جن میں سے بیشتر غزہ سٹی سے متعلق ہیں۔ اقوام متحدہ کے اندازے کے مطابق اگست کے آخر میں غزہ سٹی اور اس کے مضافات میں تقریباً دس لاکھ افراد رہائش پذیر تھے، جہاں قحط کا اعلان بھی کیا جا چکا ہے۔

اسرائیل نے غزہ سٹی پر ایک وسیع فضائی اور زمینی حملہ شروع کیا ہے، جس کا مقصد حماس کو ختم کرنا بتایا جاتا ہے۔ 

غزہ کی وزارت صحت کے مطابق جمعرات کو طلوع فجر سے اب تک وسطی اور جنوبی غزہ میں بمباری کے نتیجے میں کم از کم 38 فلسطینی ہلاک ہوئے ہیں۔

اسرائیلی فوج نے جمعرات کو وسطی اور جنوبی غزہ میں گھروں اور خیموں پر حملے کیے، جن میں فلسطینی خاندانوں کو نشانہ بنایا گیا اور کم از کم 17 افراد ہلاک ہو گئے۔ ہلاک ہونے والوں میں 10 بچے اور تین خواتین بھی شامل ہیں۔