غزہ پٹی میں اسرائیلی حملوں میں مزید 44 فلسطینی ہلاک

غزہ (ڈیلی اردو/اے پی/ڈی پی اے/اے ایف پی/روئٹرز) غزہ پٹی پر اسرائیلی فضائی حملوں اور فائرنگ میں ہفتے کے روز کم از کم 44 فلسطینی مارے گئے، جن میں ایک ہی خاندان کے نو افراد بھی شامل ہیں۔ یہ نئی ہلاکتیں ایسے وقت ہو رہی ہیں جب عالمی سطح پر جنگ بندی کے لیے دباؤ میں اضافہ ہو رہا ہے لیکن اسرائیلی وزیر اعظم بینجمن نیتن یاہو جنگ جاری رکھنے پر ڈٹے ہوئے ہیں۔

غزہ پٹی میں حماس کے زیر انتظام وزارت صحت کے مطابق النصیرات کیمپ میں ایک گھر پر حملے میں نو افراد ہلاک ہوئے جبکہ ایک خیمے پر حملے میں پانچ افراد مارے گئے۔ 

الشفا ہسپتال کے ڈائریکٹر، ڈاکٹر محمد ابو سلمیہ نے کہا کہ ہسپتال کے قریب اسرائیلی ٹینکوں کی موجودگی نے مریضوں اور طبی عملے کے لیے شدید رکاوٹیں پیدا کر دی ہیں۔ اس وقت وہاں 159 مریض زیر علاج ہیں۔

انہوں نے بتایا کہ حملے مسلسل جاری ہیں اور ایک لمحے کے لیے بھی نہیں رکے۔ ادھر الہیلُو ہسپتال میں 14 نوزائیدہ بچوں کو انکیوبیٹرز میں رکھا گیا ہے، تاہم ہسپتال کے سربراہ ڈاکٹر ناصر بلبُل کے مطابق ڈرونز کی پروازوں کے باعث ہسپتال کا مرکزی دروازہ بند کر دیا گیا ہے۔

ان حملوں میں اس وقت تیزی دیکھی گئی ہے، جب نیتن یاہو نے جمعے کی شام اقوام متحدہ کی جنرل اسمبلی سے اپنے خطاب میں کہا کہ اسرائیل کو ’’غزہ میں حماس کے خلاف کام مکمل کرنا ہوگا۔‘‘

اسی دوران امریکی صدر ڈونلڈ ٹرمپ اور وزیر اعظم نیتن یاہو کی ایک ملاقات آئندہ پیر کے روز کے لیے طے ہے، جس کے بارے میں کہا جا رہا ہے کہ اس میں غزہ پٹی میں جاری جنگ پر بات چیت کی جائے گی۔