فرانس: داعش سے تعلق کے شبہے میں افغان شہری گرفتار

پیرس (ڈیلی اردو/اے ایف پی) فرانس میں افغانستان سے تعلق رکھنے والے 20 سالہ شخص کو شدت پسند تنظیم داعش کے ذیلی گروہ ’’داعش خراساں‘‘ سے تعلق کے شبہے میں گرفتار کر لیا گیا ہے۔

فرانسیسی انسدادِ دہشت گردی پراسیکیوٹر کے دفتر کے مطابق گرفتار افغان شہری پر دہشت گرد تنظیم میں شمولیت اور دہشت گردی کی مالی معاونت کے الزامات عائد کیے گئے ہیں۔ اسے گزشتہ ہفتے شہر لیون سے گرفتار کیا گیا تھا اور اس وقت وہ عدالتی تحویل میں ہے۔

انسدادِ دہشت گردی یونٹ کا کہنا ہے کہ مشتبہ شخص پر شبہ ہے کہ وہ ’’داعش خراساں‘‘ سے رابطے میں تھا۔ حکام کے مطابق وہ اس تنظیم کی تشہیری سرگرمیوں میں مدد فراہم کر رہا تھا، رقوم کی منتقلی میں ملوث تھا اور انتہا پسندانہ پیغامات کا ترجمہ و ترسیل بھی کرتا تھا۔

’’داعش خراساں‘‘ افغانستان میں سرگرم داعش کا ایک ذیلی گروہ ہے جو وسطی ایشیا کی سابق سوویت ریاستوں، بشمول ازبکستان میں بھی کارروائیاں کرتا ہے۔ یہ گروہ افغانستان اور روس میں متعدد خونریز حملوں کا ذمہ دار قرار دیا جاتا ہے، جن میں مارچ 2024 میں ماسکو کے کنسرٹ ہال پر حملہ بھی شامل ہے، جس میں 150 افراد ہلاک ہوئے تھے۔

فرانسیسی روزنامہ ’لو پریزیاں‘ کے مطابق مذکورہ افغان شخص چند برس قبل فرانس آیا تھا۔ اسے فرانس کی داخلی انٹیلیجنس ایجنسی (DGSI) کے اہلکاروں نے لیون کے ایک انتظامی حراستی مرکز سے گرفتار کیا۔

اخبار نے مزید بتایا کہ مشتبہ شخص پہلے ہی انتہا پسندانہ نظریات کے پرچار کے الزام میں زیرِ تفتیش تھا، اور وہ ٹک ٹاک اور سنیپ چیٹ جیسے سوشل میڈیا پلیٹ فارمز پر داعش کے پروپیگنڈا مواد کی تدوین اور تشہیر کر رہا تھا۔