لاہور: حکومت فوج کے پیچھے چھپنے سے گریز کرے، سابق وزیر داخلہ احسن اقبال

لاہور (ڈیلی اردو) پاکستان مسلم لیگ (ن) کے رہنما احسن اقبال نے کہا ہے کہ آرمی چیف اور فوج پاکستان تحریک انصاف کے نہیں ہیں۔ حکومت فوج کے پیچھے چھپنے سے گریز کرے۔

لاہور میں ماڈل ٹاؤن میں مسلم لیگ (ن) کے رہنما اور سابق وفاقی وزیر داخلہ احسن اقبال نے پریس کانفرنس کرتے ہوئے کہا کہ حکومت ملک کو تجربوں کی بنیاد پر چلا رہی ہے۔ حکومت نے سو سے زائد سینئر افسران کا تبادلہ کیا۔ حکومت کو سمجھ نہیں آرہی ملک کیسے چلانا ہے۔احسن اقبال نے کہا ڈرائیور اناڑی ہوگا تو پھر یہی حال ہوگا، ہر ناکامی کا الزام افسروں پر لگایا جاتا ہے۔ قصور افسران کا نہیں وزیراعظم کا ہے۔ 3 دن سپریم کورٹ حکومت کی غلطیاں ٹھیک کرتی رہی۔

احسن اقبال نے کہا وزیراعظم نے اقتصادی اور قانونی ٹیم کو شاباش دی کیا انہوں نے مہنگائی میں اضافہ کرنے پر ٹیم کو شاباش دی ہے، دس لاکھ سے زائد لوگ بےروزگار ہو چکے ہیں۔

انہوں نے کہا سابق حکومت میں پاکستان کی کرنسی ایشیا میں مضبوط تھی لیکن آج پاکستان کا روپیہ کمزور ترین ہے۔

انہوں نے مسئلہ کشمیر پر بات کرتے ہوئے کہا کہ وزیراعظم کو نیند کیسے آجاتی ہے؟کتنے دورے کئے وزیراعظم یا وزیر خارجہ نے مسئلہ کشمیر پر آواز بلند کرنے کیلئے۔

انہوں نے کہا شاہ محمود قریشی ملتان میں مریدوں کے سامنے کھڑے ہو کر بس بیان جاری کر دیتے ہیں احسن اقبال نے مزید کہا کہ آج سرکاری دفاتر میں بے انتہا کرپشن ہو رہی ہے اور موجودہ حکومت کرپٹ ترین حکومت ہے۔