لاہور میں بدبخت بیٹے نے جائیداد تنازع پر ماں، بھائی اور بھابھی کو قتل کردیا

لاہور (اے ڈی شہزاد) پنجاب کے صوبائی دارالحکومت لاہور میں بدبخت بیٹے نے جائیداد کے تنازع پر اپنی ماں ،بھائی اور بھابھی کو فائرنگ کرکے موت کے گھاٹ اتار دیا۔

تفصیلات کے مطابق جائیداد کے بٹوارے پر جھگڑے کے باعث قتل کی اندوہناک واردات نشتر کالونی کے ایک نجی ہاؤسنگ سوسائٹی میں ہوئی، ملزم محمد علی نے اپنی 55 سالہ ماں گلشن بی بی، 40 سالہ بھائی حماد اور 39 سالہ بھابھی لبنیٰ بی بی کو گولیاں ماریں۔

 فائرنگ کے وقت ملزم کی بھابھی لبنیٰ نے بھاگ کر جان بچانے کی کوشش کی لیکن ملزم نے پیچھے پہنچ کر گھر کے گیراج میں قتل کردیا، مقتول میاں بیوی کے پانچ بچے ہیں۔

واقعہ کی اطلاع ملتے ہی پولیس کی بھاری نفری اور فرانزک کی ٹیمیں جائے وقوعہ پر پہنچ گئیں، شواہد اکٹھے کیے اور لاشیں پوسٹ مارٹم کے لئے مردہ خانے منتقل کر دیں۔

پولیس کا کہنا ہے کہ ملزم کی گرفتاری کے لیے دو ٹیمیں تشکیل دے دی ہیں، جلد ملزم کو گرفتار کرلیا جائے گا۔