لاہور ہائیکورٹ: القاعدہ کا سزا یافتہ مجرم دہشتگردی کے الزام سے بری

لاہور (ڈیلی اردو) لاہور ہائیکورٹ نے دھماکا خیزمواد رکھنے اور القاعدہ سے تعلق کے الزام میں سزا پانے والے شہری کو بری کردیا۔

لاہور ہائیکورٹ کے چیف جسٹس امیر بھٹی کی سربراہی میں 2 رکنی بینچ نے فیصلہ جاری کیا۔

عدالت کے فیصلے میں کہا گیا ہے کہ دونوں گواہوں کے بیانات میں اختلاف سے شکوک پیدا ہوگئے ہیں، ریڈ کرنے والی پارٹی میں 5 لوگ تھے تو فرار ملزمان کے پیچھے کیوں نہیں بھاگے؟

فیصلے کے مطابق ایف آئی آر کی کہانی بنانے والے نے گرینیڈ کا نمبر نہیں دیا، اس لیے بم ریکوری مشکوک ہے۔

فیصلے کے مطابق ملزم کے وکیل نے دلائل میں کہا کہ یاسر کو نامعلوم افراد نے اٹھایا، والد نے مئی 2015 میں مقدمہ درج کرایا، معاملے پر جے آئی ٹی کی تشکیل کا حکم ہوا اور 20 مئی 2015 کو رپورٹ طلب کی گئی، پولیس نے اپنے آپ کو بچانے کیلئے یاسر پر بم کا جھوٹا کیس بنایا۔

اس حوالے سے فیصلے میں کہا گیا ہے کہ مطابق ملزم کی والد کی جانب سے مسنگ رپورٹ کا نکتہ نظر انداز نہیں کیا جاسکتا، جے آئی ٹی کو انکوائری سونپی گئی تو پولیس کے پاس جھوٹا کیس کے علاوہ کوئی راستہ نہیں بچا۔

خیال رہے کہ یاسراورنگزیب کو لاہور کے لاری اڈا سے سی ٹی ڈی نےگرفتار کیا تھا۔ ایف آئی آر کے متن کے مطابق یاسر کے 2 ساتھی القاعدہ کے کمانڈر اسد اور مبشر لاری اڈے سے فرار ہوگئے تھے۔

یاسر اورنگزیب کو انسداد دہشتگردی عدالت سے نومبر 2015 میں 28 سال کی سزا ہوئی تھی۔