لاہور ہائیکورٹ میں وکیل کے مبینہ تشدد سے سب انسپکٹر ہلاک

لاہور (ڈیلی اردو) لاہور ہائیکورٹ میں ملزم پارٹی کے ساتھ جھگڑے میں پنجاب پولیس کا سب انسپکٹر ہلاک ہو گیا۔

سب انسپکٹر سلیمان، ملزم حسنین علی کی ضمانت کا ریکارڈ لیکر لاہور ہائیکورٹ آیا تھا، ضمانت خارج ہونے پر سب انسپکٹر سلیمان اور ملزم پارٹی کے درمیان جھگڑا ہو گیا۔

جھگڑے کے دوران سب انسپکٹر سلیمان بے ہوش ہو کر گر پڑا، سب انسپکٹر سلیمان کو ہسپتال منتقل کیا گیا تاہم وہ جانبر نہ ہو سکا۔

ملزم کے دو وکلا سید منظر عباس اور تنویر صادق نے سب انسپکٹر کی گرفت سے ملزم کو نکالنے کے لیے تشدد کا نشانہ بنایا۔ پولیس حکام کے مطابق مرنے والا سب انسپکٹر روزے سے تھا.

اس حوالے سے پولیس ترجمان کا کہنا ہے کہ لاہور ہائیکورٹ میں ہلاک سب انسپکٹر وکیل کے مبینہ تشدد سے ہلاک ہوا، سب انسپکٹر سلیمان سیالکوٹ سے پیشی کے لیے ہائیکورٹ آیا تھا۔

پولیس ترجمان کا کہنا ہے کہ قائم مقام سی سی پی او شہزادہ سلطان نے واقعے کا نوٹس لے لیتے ہوئے شہزادہ سلطان نے ایس پی ہائیکورٹ سکیورٹی سے رپورٹ طلب کر لی ہے۔

سی سی پی او شہزادہ سلطان نے واقعے کی مکمل تحقیقات کا حکم دیتے ہوئے کہا کہ پوسٹ مارٹم رپورٹ اور شواہد کی روشنی میں ذمہ داروں کے خلاف کارروائی کی جائے۔

یاد رہے کہ ملزم حسنین علی کے خلاف تھانہ بدو ملہی میں مقدمہ درج ہے۔