لبنان میں نئے اسرائیلی فضائی حملوں میں دو افراد ہلاک

بیروت (ڈیلی اردو) لبنان کی وزارت صحت کے مطابق اسرائیلی مسلح افواج نے جنوبی لبنان میں ایک بار پھر فضائی حملے کیے ہیں، جن کے نتیجے میں کم از کم دو افراد ہلاک ہو گئے۔ یہ اسرائیل اور لبنان کی حزب اللہ ملیشیا کے مابین جنگ بندی کے باوجود اسرائیل کے اس ہمسایہ ملک پر فضائی حملوں کے سلسلے کی نئے کڑی ہے۔

بیروت میں ملکی وزارت صحت کی طرف سے اتوار 26 اکتوبر کے روز ایک بیان میں کہا گیا کہ اسرائیل نے لبنان کے صوبے طائر میں الناقورہ کے مقام پر ایک گاڑی کو ایک فضائی حملے میں نشانہ بنایا، جس کے نتیجے میں ایک شخص ہلاک ہو گیا۔

اس بیان میں مزید کہا گیا، ’’ایک اور اسرائیلی فضائی حملہ مشرقی لبنان میں بعلبک کے علاقے میں نبی شیت کے مقام پر کیا گیا۔ اس میں بھی ایک کار کو فضا سے حملے کا نشانہ بنایا گیا، جس کے نتیجے میں ایک شخص ہلاک ہو گیا۔‘‘ اسرائیلی فوج نے لبنان میں کیے گئے ان تازہ فضائی حملوں پر نہ کوئی تبصرہ کیا  ہےاور نہ ہی کوئی ردعمل ظاہر کیا ہے۔

غزہ پٹی میں اسرائیل اور حماس کی جنگ کے تناظر میں اسرائیل اور لبنان میں حزب اللہ ملیشیا کے مابین بھی جنگ ہوئی تھی، جس کی وجہ حزب اللہ کے اسرائیل پر کیے جانے والے حملے بنے تھے۔

اس لبنانی اسرائیلی جنگ میں گزشتہ برس کے آخری مہینوں میں ایک فائر بندی معاہدہ طے پا گیا تھا۔ لیکن اب جب کہ اس جنگ بندی کو بھی تقریباﹰ ایک سال ہونے کو ہے، اسرائیل کی طرف سے لبنان میں کیے جانے والے فضائی حملوں میں مخصوص علاقوں یا مشتبہ افراد کی گاڑیوں کو نشانہ بنانے کا عسکری عمل وقفے وقفے سے جاری رہتا ہے۔

حالیہ ہفتوں میں لبنان میں اسرائیلی فضائی حملوں میں مقابلتاﹰ تیزی آ چکی ہے، جس کی وجہ اسرائیلی ذرائع کے مطابق لبنان سے اسرائیل پر کیے جانے والے حملے ہیں۔

حوثی باغیوں نے معروف ماڈل انتصار الحمدانی کو قریب پانچ سال بعد رہا کر دیا

یمن کے حوثی باغیوں نے معروف ماڈل انتصار الحمدانی کو قریب پانچ سال بعد رہا کر دیا ہے۔ تیئیس سالہ الحمدانی کو فروری 2021ء میں صنعاء میں اس وقت گرفتار کر لیا گیا تھا، جب وہ ایک فوٹو شوٹ کے لیے جا رہی تھیں۔

انتصار الحمدانی کی رہائی کی ان کے وکیل اور حوثی باغیوں کے قریبی ایک سکیورٹی ذریعے نے بھی تصدیق کر دی ہے۔ موجودہ ویک اینڈ پر رہا کی جانے والی ماڈل انتصار الحمدانی پر ان کے گرفتاری کے بعد جسم فروشی اور منشیات سے متعلق مختلف الزامات لگائے گئے تھے اور انہی الزامات میں انہیں پانچ سال قید کی سزا سنائی گئی تھی۔

انتصار الحمدانی کے خلاف 2021ء میں لگائے گئے ان الزامات کو ان کے وکیل اور انسانی حقوق کے لیے سرگرم کئی بین الاقوامی تنظیموں نے بھی بے بنیاد اور من گھڑت قرار دیا تھا۔ اس نوجوان خاتون ماڈل پر یہ الزامات ایران نواز حوثی باغیوں کی طرف سے آزادی نسواں کی مخالفت کرتے ہوئے عائد کیے گئے تھے۔

انتصار الحمدانی کے وکیل خالد الکمال نے نیوز ایجنسی اے ایف پی کو بتایا، ’’ انتصار الحمدانی کو ہفتے اور اتوار کی درمیانی رات رہا کر دیا گیا اور اس وقت وہ اپنے گھر پر ہیں۔‘‘

خالد الکمال نے کہا، ’’انتصار الحمدانی کو قید کے دوران کئی طرح کے طبی مسائل اور بیماریوں کا سامنا کرنا پڑا، جن کی وجہ سے ان کیصحت بھی خراب ہو گئی۔ یہ سب کچھ محض اس وجہ سے ہوا کہ انہیں اپنے خلاف ناانصافی کا سامنا کرنا پڑا۔‘‘

جیل میں خودکشی کی ناکام کوشش

انسانی حقوق کے لیے سرگرم تنظیموں کے مطابق دوران حراست انتصار الحمدانی نے 2021ء میں خود کشی کی کوشش بھی کی تھی۔

الحمدانی ایک یمنی والد اور ایتھوپیا سے تعلق رکھنے والی والدہ کی اولاد ہیں اور انہوں نے اپنی گرفتاری سے پہلے اپنی درجنوں ایسی تصاویر آن لائن پوسٹ کی تھیں، جن میں وہ روایتی یمنی لباس، جینز، لیدر جیکٹ یا دیگر ملبوسات پہنے ہوئے ہوتی تھیں اور یہ تصویریں انہوں نے سر پر اسکارف پہنے ہوئے اور اسکارف کے بغیر بھی بنوائی تھیں۔

وہ اپنی گرفتاری سے قبل سوشل میڈیا پر ایک مشہور شخصیت بن چکی تھیں۔ انسانی حقوق کی تنظیم ہیومن رائٹس واچ کے مطابق انتصار الحمدانی نے اپنی گرفتاری سے پہلے چار سال تک ماڈلنگ کی تھی اور یمنی ٹیلی وژن کی دو سیریز میں اداکاری بھی۔

انسانی حقوق کی تنظیم ایمنسٹی انٹرنیشنل کے مطابق دوران حراست انتصار الحمدانی پر حوثی باغیوں کے تفتیش کاروں کی طرف سے ان سے جسم فروشی اور منشیات سے متعلق جھوٹے الزامات کے سلسلے میں اعترافی بیانات لینے کے لیے اس ماڈل پر ذہنی اور جسمانی تشدد بھی کیا تھا۔