لوئر دیر میں دہشت گردوں کا چیک پوسٹ پر حملہ، لیویز حوالدار ہلاک، 2 پولیس اہلکار زخمی

لوئر دیر (نمائندہ ڈیلی اردو) صوبہ خیبر پختونخوا کے ضلع لوئر دیر میں پولیس اور لیویز کی مشترکہ چیک پوسٹ پر دہشتگردوں نے حملے میں ایک حوالدار ہلاک جبکہ دو پولیس اہلکار زخمی ہوگئے۔

تفصیلات کے مطابق پیر اور منگل کی درمیانی رات کو لوئر دیر میں پولیس اور لیویز کی مشترکہ چیک پوسٹ پر دہشتگردوں نے حملہ کردیا۔ دونوں اطراف سے شدید فائرنگ کا تبادلہ ہوا۔

سرکاری ذرائع کے مطابق دہشت گردوں کی فائرنگ سے لیویز فورس کے حوالدار قصیر محمود ہلاک جبکہ دو پولیس اہلکار زخمی ہوئے۔

پولیس اور دیر لیویز کی اہلکاروں کی جوابی فائرنگ سے ایک دہشت گرد بھی مارا گیا ہے۔

سیکورٹی فورسز نے دہشت گرد کی لاش قبضہ میں لے لی۔

زخمی اہلکاروں کو ڈسٹرکٹ ہیڈکوارٹر ہسپتال تیمرگرہ منتقل کر دیا گیا۔ تکورا کنڈاؤ کے علاقے کو سیکورٹی فورسز نے گھیرے میں لے کر سرچ آپریشن شروع کر دیا۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی ہے۔

ترجمان نے اپنے ایک بیان میں کہا کہ مجاہدین نے گزشتہ شب بارہ بجے کے قریب باجوڑ کی تحصیل سلارزئی کے علاقے ”ٹاکوَرہ“ میں تحریک طالبان پاکستان کے مجاہدین نے دیر اور باجوڑ کو ملانے والے بارڈر پر قائم پولیس چوکیوں پر حملہ کیا۔
حملہ دو گھنٹوں تک جاری رہا، جس میں تین پولیس اہلکار ہلاک اور تین زخمی ہوئے۔

‏اور ان کی چوکیاں اور الیکٹرانک سسٹم نذر آتش کردیا گیا، جبکہ مجاہدین کو ایک کلاشنکوف اور اس کی سینکڑوں گولیاں بھی غنیمت کے طور پر حاصل ہوئیں۔

فائرنگ کے تبادلے میں ہمارا ایک مجاہد بھی مارا گیا۔