لوئر دیر میں پولیس کی گاڑی کے قریب دھماکا، چار اہلکار زخمی

پشاور (ڈیلی اردو) صوبہ خیبر پختونخوا کے ضلع لوئر دیر کے میدانی علاقے دارو جبگئی میں پولیس وین پر ریموٹ کنٹرول کی مدد سے بم دھماکا کیا گیا۔

پولیس کے مطابق دھماکے میں ایلیٹ فورس کے 4 اہلکار زخمی ہوئے جنہیں طبی امداد کے لئے لعل قلعہ ہسپتال منتقل کر دیا گیا ہے۔

ذرائع کے مطابق زخمیوں کی شناخت ہیڈ کانسٹیبل ناصر خان، کانسٹیبل محمد اسلام، خکانسٹیبل حیات ذادہ اور کانسٹیبل باروز خان کے نام سے کی گئی۔

پولیس نے بتایا کہ ایلیٹ فورس کے اہلکار سرچ آپریشن کے لیے جا رہے تھے کہ ان کی گاڑی کو ریموٹ کنٹرول بم کی مدد سے نشانہ بنایا گیا۔ دھماکے میں پولیس کی گاڑی کو جزوی طور پر نقصان پہنچا ہے۔

دھماکے کے فوری بعد سیکیورٹی فورسز نے علاقہ کو گھیرے میں لے لیا ہے اور سرچ آپریشن جاری ہے۔

پولیس حکام کا کہنا ہے کہ دھماکے کی نوعیت جاننے کے لئے تحقیقات کا آغاز کردیا گیا۔