لکی مروت: دہشت گردوں نے بارودی مواد سے پولیس اہلکار کا گھر تباہ کر دیا

لکی مروت (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع لکی مروت کے تھانہ شادی خیل کی حدود میں مسلح دہشت گردوں نے ایک پولیس اہلکار کے گھر کو بارودی مواد سے نشانہ بنایا، جس کے نتیجے میں گھر کی بیٹھک مکمل طور پر منہدم ہو گئی۔

پولیس کے مطابق واقعہ شادی خیل کے علاقے میں پیش آیا، جہاں نامعلوم حملہ آوروں نے پولیس اہلکار تحصیل خان کے گھر کو نشانہ بنایا۔

ابتدائی اطلاعات کے مطابق دھماکے میں کوئی جانی نقصان نہیں ہوا۔ تاہم گھر کے ایک حصے کو شدید نقصان پہنچا ہے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے گئے۔

پولیس حکام کے مطابق واقعے کی مختلف پہلوؤں سے تحقیقات جاری ہیں۔