لکی مروت: عسکریت پسندوں کا بڑا منصوبہ ناکام، 20 کلوگرام سے زائد بارودی مواد ناکارہ

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں عسکریت پسندوں کے ناپاک عزائم خاک میں ملا دیے گئے اور تھانہ صدر کی حدود میں دہشت گردی کا بڑا منصوبہ ناکام بنا دیا گیا۔

احمد خیل روڈ پر پولیس نے خفیہ اطلاع پر کارروائی کرتے ہوئے نصب دو دیسی ساختہ بم برآمد کر لیے۔ بم ناکارہ بنانے والے عملے نے بروقت کارروائی کرتے ہوئے 20 کلوگرام سے زائد بارودی مواد محفوظ طریقے سے ناکارہ بنا دیا۔

پولیس حکام کے مطابق بروقت حکمت عملی اور پیشہ ورانہ مہارت کے باعث ممکنہ جانی نقصان سے بچا لیا گیا اور علاقے میں سرچ آپریشن بھی جاری ہے۔

انسپکٹر جنرل خیبر پختونخوا ذوالفقار حمید نے کامیاب کارروائی پر پولیس جوانوں کو خراج تحسین پیش کرتے ہوئے کہا کہ فورس عوام کے جان و مال کے تحفظ کے لیے ہر وقت تیار ہے اور عسکریت پسندوں کے خلاف کارروائیاں جاری رہیں گی۔