لکی مروت میں دھماکہ، دو افراد ہلاک، 10 زخمی

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت کے علاقے منجیوالہ چوک میں زوردار دھماکے کے نتیجے میں دو افراد ہلاک جبکہ 10 زخمی ہو گئے ہیں۔

پولیس کے مطابق دھماکہ پولیس امن کمیٹی کے صدر خالد خان کے بھائی کی بیٹری شاپ کے قریب ہوا، جس میں شعیب خان سمیت 10 افراد زخمی ہوئے تھے۔

ہسپتال ذرائع کا کہنا ہے کہ زخمیوں کا تعلق زیادہ تر وانا اور گردونواح سے بتایا جا رہا ہے۔ بعد ازاں شعیب خان اور فرقان خان زخموں کی تاب نہ لاتے ہوئے ہسپتال منتقل کیے جانے کے دوران ہلاک ہو گئے۔ زخمیوں میں دو افراد کی حالت تشویشناک بتائی جا رہی ہے۔

پولیس کے مطابق ابتدائی طور پر دھماکے کی نوعیت آئی ای ڈی یا کواڈ کاپٹر حملہ ہونے کا شبہ ظاہر کیا گیا تھا، تاہم بعد میں پولیس ترجمان نے بتایا کہ دھماکہ موٹر سائیکل میں نصب آئی ای ڈی کے ذریعے کیا گیا۔

ترجمان کے مطابق بارودی مواد شعیب بیٹری شاپ کے قریب کھڑی موٹر سائیکل میں نصب تھا۔

واقعے کے بعد علاقے میں سکیورٹی سخت کر دی گئی ہے جبکہ پولیس نے سرچ آپریشن شروع کر دیا ہے اور داخلی و خارجی راستوں پر ناکہ بندی بھی کر دی گئی ہے۔