لکی مروت میں دہشت گردوں کی فائرنگ سے پولیس اہلکار ہلاک

لکی مروت (ڈیلی اردو) پاکستان کے شورش زدہ صوبہ خیبر پختونخوا کے ضلع لکی مروت کے تھانہ ڈاڈیوالہ کی حدود میں واقع گاؤں کیچی کمر میں نامعلوم دہشت گردوں کی فائرنگ سے پولیس اہلکار عرفان اللہ شدید زخمی ہو گئے، جو بعد ازاں زخموں کی تاب نہ لاتے ہوئے ہلاک ہو گئے۔

پولیس کے مطابق عرفان اللہ پشاور پولیس میں تعینات تھے۔ واقعے کے بعد حملہ آور موقع سے فرار ہو گئے۔

زخمی اہلکار کو فوری طور پر قریبی نورنگ ہسپتال منتقل کیا گیا، تاہم ڈاکٹروں نے ان کی موت کی تصدیق کر دی۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے میں سرچ آپریشن شروع کر دیا گیا ہے تاکہ حملہ آوروں کا سراغ لگایا جا سکے۔ 

حکام کے مطابق شواہد اکٹھے کیے جا رہے ہیں اور مختلف پہلوؤں سے تفتیش جاری ہے۔