لکی مروت میں پولیس اسٹیشن اور سیکیورٹی فورسز کے کیمپ پر حملہ، دو اہلکار ہلاک

لکی مروت (ڈیلی اردو) پاکستان کے شورش زدہ صوبہ خیبر پختونخوا کے ضلع لکی مروت کے سب ڈویژن بیٹنی کے علاقے میں تھانہ شادی خیل اور قریبی سیکیورٹی فورسز کے کیمپ پر مسلح دہشت گردوں نے رات کے وقت حملہ کر دیا۔

حملے کے دوران دونوں جانب سے بھاری ہتھیاروں کا استعمال کیا گیا، جس کے نتیجے میں پولیس اور سیکیورٹی فورسز کے اہلکاروں اور حملہ آوروں کے درمیان تقریباً دو گھنٹے تک شدید فائرنگ کا تبادلہ جاری رہا۔

فائرنگ کے نتیجے میں پولیس اہلکار عرفان اللہ اور سیکیورٹی فورسز کے اہلکار وسیم ہلاک ہو گئے۔ پولیس ترجمان کے مطابق فائرنگ سے قریبی سول آبادی بھی متاثر ہوئی ہے، جبکہ جائے وقوع سے شواہد اکٹھے کیے جا رہے ہیں۔

واضح رہے کہ اس سے دو روز قبل بھی اسی علاقے میں متعدد پرتشدد واقعات پیش آئے تھے۔ گاؤں عبدالخیل سے تعلق رکھنے والے اینٹی نارکوٹکس فورس کے اہلکار فرید اللہ کو اغوا کے بعد ہلاک کیا گیا تھا۔

اگلے روز اسی گاؤں کے رہائشی ایک جیل پولیس اہلکار کو احمدخیل اڈہ سے اغوا کے بعد ہلاک کر دیا گیا، جبکہ کرک جیل میں تعینات اہلکار صدیق اللہ کی لاش احمدخیل کے علاقے سے برآمد ہوئی تھی۔

گزشتہ ہفتے گاؤں بیگوخیل سے تعلق رکھنے والے دو نوجوان صفی اللہ اور افنان کو لنگرخیل ہاتھی خان کے قریب فائرنگ کر کے ہلاک کیا گیا تھا، جبکہ دہشت گردوں نے ان سے اسلحہ اور موٹرسائیکل بھی چھین کر فرار ہو گئے تھے۔