لکی مروت میں پولیس موبائل پر حملہ، افسر سمیت 4 اہلکار ہلاک، ٹی ٹی پی نے ذمہ داری قبول کرلی

اسلام آباد (ش ح ط) صوبہ خیبر پختونخواہ کے ضلع لکی مروت میں پولیس موبائل پر فائرنگ کے نتیجے میں پولیس افسر سمیت 4 اہلکار ہلاک ہو گئے۔

تفصیلات کے مطابق پولیس وین میں سوار اہلکار لکی میانوالی روڈ پر گشت کر رہے تھے کہ 2 موٹرسائیکلوں پر سوار نامعلوم ملزمان نے اندھا دھند فائرنگ کر دی۔

پولیس کے مطابق فائرنگ سے اسسٹنٹ سب انسپکٹر (اے ایس آئی) سمیت 4 اہلکار ہلاک ہو گئے اور ملزمان فائرنگ کے بعد موقع سے فرار ہو گئے۔

ریسکیو اہلکاروں نے لاشوں کو سٹی ہسپتال منتقل کر دیا ہے۔

لکی مروت: زین الدین پیٹرول پمپ کے قریب لکی میں پولیس موبائل پر فائرنگ کے نتیجے میں چار پولیس اہلکار موقع پر شہید نماز جنازہ آج صبح پولیس لائن میں ادا کیا گیا ۔
جنازے میں ڈپٹی کمشنر جناب اقبال حسین، DPO شہزاد عمر عبّاس بابر اور DEO انجنیئر فصیح اللّه خان نے جنازے میں شرکت کی pic.twitter.com/AdjADqff7E

— Rescue 1122 Lakki Marwat (@1122Lakki) October 27, 2021

پولیس حکام کا بتانا ہے کہ ہلاک ہونے والوں اہلکاروں میں اے ایس آئی یعقوب خان، کانسٹیبل مستقیم، کانسٹیبل انعام اور ڈرائیور رحیم اللّہ شامل ہیں۔

آر پی او، ڈی پی او سمیت پولیس کی بھاری نفری جائے وقوعہ پر موجود ہے اور علاقے میں حملہ آوروں کی تلاش کیلئے سرچ آپریشن جاری ہے۔ تاہم تاحال کوئی گرفتاری عمل میں نہیں لائی جا سکی۔

دوسری جانب پولیس موبائل پر حملے کی ذمہ داری کالعدم تنظیم تحریک طالبان نے قبول کرلی۔