لکی مروت میں پولیس موبائل پر دھماکا، ایس ایچ او سمیت 7 اہلکار ہلاک

لکی مروت (ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں شادی خیل بیٹنی کے علاقے میں رسول خیل چیک پوسٹ کے قریب پولیس موبائل کو آئی ای ڈی دھماکے کا نشانہ بنایا گیا، جس کے نتیجے میں ایس ایچ او سمیت 7 پولیس اہلکار ہلاک ہو گئے۔

ریسکیو 1122 کے مطابق دھماکے میں ہلاک ہونے والوں میں ایس ایچ او صدر اعظم، کانسٹیبل شاہ بہرام، کانسٹیبل شاہ خالد، کانسٹیبل حاجی محمد، کانسٹیبل گل زادہ اور کانسٹیبل سخی زادہ شامل ہیں، جبکہ کانسٹیبل انصاف الدین شدید زخمی ہوئے ہیں۔ امدادی ٹیموں نے موقع پر پہنچ کر ہلاک اہلکاروں اور زخمی کو فوری طور پر ہسپتال منتقل کر دیا۔

وزیراعظم پاکستان شہباز شریف نے لکی مروت میں پولیس موبائل پر دہشت گردوں کے حملے کی شدید مذمت کرتے ہوئے کہا ہے کہ سکیورٹی فورسز کی قربانیاں ہرگز رائیگاں نہیں جانے دیں گے اور ملک سے دہشت گردی کے مکمل خاتمے کے لیے حکومت پرعزم ہے۔

لکی مروت میں گزشتہ چند دنوں کے دوران تشدد کے واقعات میں نمایاں اضافہ دیکھا گیا ہے۔ چند روز قبل منجیوالہ کے علاقے میں ایک مارکیٹ میں دھماکے سے دو افراد ہلاک اور 10 زخمی ہو گئے تھے۔ اس کے علاوہ مختلف علاقوں سے لاشیں ملنے اور جھڑپوں کے واقعات بھی رپورٹ ہوئے ہیں۔

ضلعی پولیس افسر نذیر خان کے مطابق حالیہ واقعات کی تحقیقات جاری ہیں جبکہ علاقے میں سکیورٹی مزید سخت کر دی گئی ہے۔