لکی مروت میں پولیس چوکی منجی والہ پر دہشتگردوں کا حملہ

لکی مروت (ڈیلی اردو) صوبہ خیبر پختونخوا کے ضلع لکی مروت میں پولیس چوکی منجیوالہ پر دہشتگردوں کے حملے کو ناکام بنا دیا گیا۔

تفصیلات کے مطابق دہشتگردوں نے بھاری ہتھیاروں سے لکی مروت پولیس چوکی پر حملہ کیا جب کہ جوابی فائرنگ کے باعث حملہ آور فرار ہوگئے۔

ڈسٹرکٹ پولیس افسر (ڈی پی او) لکی مروت طارق حبیب کے مطابق دو طرفہ فائرنگ میں بھاری ہتھیاروں کا بھی استعمال کیاگیا، دہشت گردوں کی فائرنگ سے کوئی جانی نقصان نہیں ہوا۔

انہوں نے بتایا کہ پولیس نے دہشت گردوں کو مورچہ زن ہونے کا موقعہ نہیں دیا جس سے وہ بھاگنے پر مجبور ہوئے۔

ڈی پی او نے منجیوالہ کےعوام کاپولیس کے شانہ بشانہ دہشت گردوں کا مقابلہ کرنے پرشکریہ ادا کیا۔

گذشتہ ماہ بھی خیبر پختونخواہ کے ضلع لکی مروت میں تھانہ غزنی اور تھانہ شہباز خیل پر دہشت گردوں کا حملہ ناکام بنایا گیا تھا ،پولیس کی بھرپور جوابی کارروائی پردہشت گرد فرار ہو گئے تھے۔

اس سے قبل ضلع لکی مروت پولیس نے ہیبت علی خان شہید پولیس اسٹیشن درہ پیزو پر دہشت گردوں کا حملہ پسپا کیا تھا۔