لکی مروت و لوئر وزیرستان سے پولیس اہلکار اور کاروباری شخصیت اغوا

پشاور (نمائندگان ڈیلی اردو) پاکستان کے شورش زدہ صوبے خیبر پختونخوا کے مختلف اضلاع میں عسکریت پسند سرگرمیوں میں اضافہ دیکھنے میں آیا ہے۔ 

لکی مروت میں تھانہ صدر کی حدود میں عسکریت پسندوں نے پولیس کانسٹیبل زینت اللہ کو اغوا کر لیا۔ پولیس ذرائع کے مطابق مغوی کانسٹیبل ڈی ایس پی ٹریفک محمد نواز خان کا گن مین ہے۔ مقامی پولیس نے فوری تحقیقات شروع کر دی ہیں اور کانسٹیبل کی بازیابی کے لیے کارروائیاں جاری ہیں۔

ادھر بنوں کے تھانہ ہوید کی حدود میں دہشت گردوں نے گیس پائپ لائن کو بارودی مواد سے اڑا دیا۔ مقامی ذرائع کے مطابق دھماکے کے زور سے پائپ لائن شدید متاثر ہوئی اور گیس لیکج جاری ہے۔ ابتدائی اطلاعات کے مطابق کسی جانی نقصان کی اطلاع موصول نہیں ہوئی، تاہم علاقے میں متعلقہ ادارے اور سیکیورٹی اہلکار موقع پر پہنچ گئے ہیں۔

اسی دوران لوئر وزیرستان میں صبح 8:30 بجے مین روڈ پر دژہ غونڈئ گنگی خیل کی حدود میں نامعلوم مسلح افراد نے ناکہ لگا کر کاروباری شخصیت عبدالجلیل کو گاڑی سے اتار کر اغوا کر لیا۔ پولیس اور مقامی انتظامیہ نے تحقیقات شروع کر دی ہیں اور مغوی کی فوری رہائی کے لیے کارروائی جاری ہے۔