مسیحیوں کے روحانی پیشوا پوپ لیو کا استنبول کی تاریخی نیلی مسجد کا دورہ

ویٹیکن (ڈیلیاردو/روئٹرز/ڈی پی اے)  مسیحیوں کے اس روحانی پیشوا پوپ لیو چہارم نے ہفتے کے روز استنبول کی تاریخی سلطان احمد مسجد (نیلی مسجد) کا دورہ کیا۔ مسلمانوں کے مذہبی عقیدے کے احترام میں انہوں نے مسجد میں داخل ہونے سے پہلے جوتے اتارے اور خاموشی سے چند لمحے کھڑے رہے۔

تاہم مسیحیوں کے اس روحانی پیشوا نے نیلی مسجد کے اندار کسی رسمی مذہبی عمل میں شرکت نہیں کی۔

 یہ دورہ پوپ لیو کے پہلے غیر ملکی سرکاری سفر کا حصہ ہے، جو رواں سال مئی میں پوپ منتخب ہونے کے بعد شروع ہوا۔ چھ روزہ اس سفر کا آغاز ترکی سے ہوا ہے، جہاں وہ تین دن قیام کر رہے ہیں۔

آج بروز ہفتہ نیلی مسجد کے مفتی نے خود پوپ کا استقبال کیا اور انہیں مسجد کے وسیع صحن اور اندرونی حصے کی سیر کرائی۔ یہ مسجد ایک ساتھ دس ہزار نمازیوں کی گنجائش رکھتی ہے۔ پوپنے مفتیِ اعظم کے ساتھ گرمجوشی سے گفتگو کی اور مسجد کی فنِ تعمیر کی تعریف کی۔

نیلی مسجد سے چند سو میٹر کے فاصلے پر واقع عالمی شہرت یافتہ آیا صوفیہ (حاجیہ صوفیہ) کا پوپ لیو نے دورہ نہیں کیا۔ 

تقریباً پندرہ سو سال پرانی اور مسیحی دنیا کی سب سے اہم گرجا گھر رہنے والی اس عمارت کو 1935ء میں ترکی کی سیکولر جمہوریہ نے ایک میوزیم قرار دے دیا تھا، تاہم 2020ء میں صدر رجب طیب ایردوان کے حکم پر اسے دوبارہ مسجد میں تبدیل کر دیا گیا تھا۔

ویٹیکن نے پوپ کے اس فیصلے پر کوئی سرکاری بیان جاری نہیں کیا۔ یاد رہے کہ پوپ فرانسس نے 2014ء میں ترکی کے دورے کے دوران آیا صوفیہ کا دورہ کیا تھا اور 2020 میں اسے مسجد میں تبدیل کرنے پر گہری تشویش ظاہر کی تھی۔

جمعے کو استنبول میں مشرق وسطیٰ کے مسیحی رہنماؤں کے ساتھ ایک تقریب سے خطاب میں پوپ لیو نے مذہب کے نام پر تشدد کی شدید مذمت کی اور تمام مسیحی فرقوں پر زور دیا کہ وہ صدیوں پرانی تقسیم کو ختم کر کے اتحاد کی طرف بڑھیں۔

ویٹیکن کے مطابق اس سفر کے دونوں مراحل (ترکی اور لبنان) کے لیے غیر معمولی سکیورٹی انتظامات کیے گئے ہیں۔ سفر کا بنیادی مقصد بین المذاہب مکالمے کو فروغ دینا اور مشرق وسطیٰ کے سنگین چیلنجز سے مشترکہ طور پر نمٹنے کا عزم ظاہر کرنا ہے۔

ترکی میں تین روزہ قیام کے بعد پوپ لیو اتوار کو لبنان روانہ ہو جائیں گے۔