مقبوضہ کشمیر میں عید میلادالنبیﷺ پر بھی کرفیو

سری نگر + اسلام آباد (ڈیلی اردو/نیوز ایجنسی) مقبوضہ کشمیر میں بھارت کے جبر اور پابندیوں کا آج 98 واں روز ہے، عید میلاد النبی ﷺ کے اجتماعات پر پابندی لگا دی ہے۔پابندی کے خلاف کشمیری نوجوانوں نے بھرپور احتجاج کیا۔ حریت کانفرنس نے کہا ہے کہ عوام بی جے پی اور آر ایس ایس سے ملے غداروں پر نظر رکھیں۔

کشمیر میڈیا سروس کے مطابق مقبوضہ کشمیر میں پہلی بار حضرت بل دربار پر عید میلاد النبی ﷺ منانے پر پابندی ہے جبکہ اس کے علاوہ کشمیر کے دیگر علاقوں میں بھی مسلمانوں کو اپنی مذہبی رسومات ادا کرنے کی اجازت نہیں دی گئی۔ ادھر اطلاعات ہیں کہ بھارتی فوج نے چیئرمین سیرت کمیٹی مولانا قیوم کو گرفتار کر لیا ہے۔

ضلع کشتواڑ میں بھارتی فورسز نے تین نوجوانوں کو گرفتار کر لیا۔ بھارت کی ظالمانہ کارروائی کے خلاف کشمیریوں نے احتجاج کیا۔

مقبوضہ وادی میں کرفیو اور لاک ڈاؤن 5 اگست سے جاری ہے، جگہ جگہ بھارتی فوجی تعینات ہیں، سری نگر سمیت تما م بڑوں شہروں میں دکانیں اور کاروباری مراکز بند ہیں، پبلک ٹرانسپورٹ نہ ہونے کے برابر ہے تو تعلیمی ادارے بند ہے۔

حریت کانفرنس نے کہا ہے کہ عوام بی جے پی اور آر ایس ایس سے ملے غداروں پر نظر رکھیں۔ ضلع کشتواڑ میں بھارتی فورسز نے تین نوجوانوں کو گرفتار کر لیا، بھارت کی ظالمانہ کارروائی کے خلاف کشمیریوں نے احتجاج کیا۔

پاکستان نے مقبوضہ کشمیر میں عید میلاد النبی ﷺ منانے پر پابندی کی مذمت کرتے ہوئے کہا ہے کہ بھارتی فوج نے وادی میں 12 ربیع الاول کے جلوس نکالنے سے روکا۔

ترجمان دفتر خارجہ کی جانب سے جاری بیان میں کہا گیا ہے کہ بھارتی فوج نے کشمیر میں مساجد بھی سیل کر دی ہیں۔ فوج کی جانب سے حضرت بل دربار جانے والے تمام راستے بند کر دیئے۔

پاکستان کی جانب سے مطالبہ کیا گیا ہے کہ بھارتی حکومت کشمیر میں فوری موبائل سروس اور انٹرنیٹ بحال کرتے ہوئے نہتے کشمیریوں کی گرفتاریوں کا سلسلہ بند کرے۔