ملیحہ لودھی کی صدر سلامتی کونسل سے ملاقات، کشمیر کی صورتحال سے آگاہ کیا

نیویارک (ڈیلی اردو/نیوز ایجنسی) اقوام متحدہ میں پاکستان کی مستقل مندوب ڈاکٹر ملیحہ لودھی نے سلامتی کونسل کی صدر کو بھارت کی جانب سے مقبوضہ کشمیر میں سلامتی کونسل کی قراردادوں کی خلاف ورزی سے آگاہ کیا۔

ڈاکٹر ملیحہ لودھی نے سلامتی کونسل کی صدر جوانا رونیکا، سفارت کاروں اور اقوام متحدہ کے حکام سے ملاقات کی اور انہیں بھارتی اقدامات کے باعث خطے کے امن و سلامتی کو لاحق خطرات سے آگاہ کیا۔

ملیحہ لودھی نے کہا کہ بھارت کے غیر قانونی اقدامات نے خطے کا امن خطرے میں ڈال دیا، سلامتی کونسل خطے کے امن کو درپیش خطرات سے نمٹنے کے لیے اقدامات کرے۔

As the UN Sec Gen is away, I met Maria Louisa Ribeiro Viotti, his chief of staff today, and asked for the UN chief to play his due role in the crisis sparked by India’s unlawful action in occupied Jammu and Kashmir and call on India to comply with UN Security Council resolutions pic.twitter.com/xIBQEsu9TK

— Maleeha Lodhi (@LodhiMaleeha) August 8, 2019

پاکستان کی سرکاری نیوز ایجنسی اے پی پی کے مطابق ملیحہ لودھی نے کہا کہ کشمیر پر بھارت کا قبضہ ختم کرانا سلامتی کونسل کی ذمے داری ہے اور اقوام متحدہ نے کشمیری عوام کے حق خود ارادیت کوتسلیم کر رکھا ہے لیکن بھارت سلامتی کونسل کی قراردادوں کی خلاف ورزیوں کا مرتکب ہو رہا ہے۔

ڈاکٹر ملیحہ لودھی نے جوانا رونیکا کو بھارتی اقدامات کے باعث خطے کے امن پر پڑنے والے خطرناک اثرات پر پاکستانی مؤقف سے آگاہ کرتے ہوئے کہا کہ بھارت طاقت کے زور پر اور یکطرفہ قانون سازی سے زمینی حقائق تبدیل نہیں کرسکتا، بھارتی اقدامات سلامتی کونسل کی قراردادوں اور عالمی قوانین کی خلاف ورزی ہیں، قراردادوں پر عملدرآمد کرانا سلامتی کونسل اور عالمی برادری کی ذمے داری ہے، پاکستان کشمیر کی سیاسی اور سفارتی حمایت ہمیشہ جاری رکھے گا۔