نائجیریا میں داعش جنگجوؤں کا فوجی اڈے پر حملہ، سات اہلکار ہلاک

ابوجا (ڈیلی اردو/اے ایف پی) نائجیریا کے شمالی علاقے میں عسکریت پسندوں نے ایک فوجی اڈے پر حملہ کر کے کم از کم سات فوجیوں کو ہلاک کر دیا۔ فوجی ذرائع کے مطابق، یہ حملہ جمعہ کی صبح نگمدو گاؤں میں کیا گیا، جو بورنو ریاست کے دارالحکومت میدوگوری سے تقریباً 100 کلومیٹر دور واقع ہے۔

’اسلامک اسٹیٹ ویسٹ افریقہ پروونس‘ (ISWAP) کے عسکریت پسندوں نے راکٹ لانچرز اور بارودی مواد سے لیس ڈرونز کے ذریعے حملہ کیا، جس میں چار فوجی گاڑیاں بھی تباہ ہوئیں۔ 

فوجی ذرائع نے بتایا کہ حملہ انتہائی منظم تھا۔ فوج کی طرف سے چھ ہلاکتوں اور چھ زخمیوں کی تصدیق کی گئی ہے۔

نائجیریا کی فوج نے ہلاکتوں کی تعداد کم بتاتے ہوئے کہا کہ حملہ آوروں کو پسپا کر دیا گیا اور قریبی فوجی اڈے سے کمک بھی پہنچائی گئی۔ حملے کے بعد میدوگوری اور داماتورو کو جوڑنے والی 120 کلومیٹر طویل شاہراہ کو عارضی طور پر بند کر دیا گیا تاکہ سڑک پر نصب دھماکہ خیز مواد کو ناکارہ بنایا جا سکے۔

فوج نے 2019 ء سے چھوٹے فوجی اڈے بند کر کے بڑے اور محفوظ ’’سپر کیمپ‘‘ قائم کیے ہیں، تاہم ناقدین کا کہنا ہے کہ اس حکمت عملی سے دیہی علاقوں میں عسکریت پسندوں کی نقل و حرکت آسان ہو گئی ہے اور مسافروں کے اغوا کے خطرات بڑھ گئے ہیں۔

ISWAP اور بوکو حرام کی جانب سے حالیہ دنوں میں حملوں میں اضافہ دیکھا گیا ہے۔ اس  شورش نے شمال مشرقی نائجیریا میں تقریباً 20 لاکھ افراد کو بے گھر کر دیا ہے اور یہ تشدد پڑوسی ممالک تک پھیل چکا ہے، جس کے خلاف علاقائی فوجی اتحاد سرگرم ہے۔