ناروے میں جاسوسی کے الزام میں 6 روسی شہری گرفتار، ڈرونز برآمد

اوسلو (ڈیلی اردو) ناروے کی پولیس کا کہنا ہے کہ آج چار روسی شہریوں کو غیرقانونی طور پر خفیہ تنصیبات کی تصاویر بناتے ہوئے گرفتار کیا ہے، چند روز قبل دو روسی شہریوں کو ڈرون رکھنے پر گرفتار کیا گیا تھا۔

غیر ملکی خبر ایجنسی کے مطابق ناروے نے حالیہ ہفتوں کے دوران اپنی سیکیورٹی میں اضافہ کیا ہے۔

ناروے کے تیل اور گیس کے انفرااسٹرکچر کے قریب ڈرون طیارے دیکھے گئے تھے جس کے بعد یہ اقدامات کیے جا رہے ہیں۔

26 ستمبر کو سوئیڈن اور ڈنمارک کے ساحلوں کے قریب نارڈ اسٹریم گیس پائپ لائنوں میں بڑی لیکیج بھی ہوگئی تھی۔

واضح رہے کہ گزشتہ جمعرات کو ناروے کی پولیس نے سرحدی چیک پوائنٹ پر ایک روسی شہری کو گرفتار کیا تھا جس کی گاڑی سے ڈرون طیارے برآمد ہوئے تھے۔

جمعہ کو ایک روسی شہری ٹرامسوائے شہر کے ایئرپورٹ پر ڈرون طیارہ اڑا رہا تھا، اس کے پاس کچھ کیمرے بھی تھے، اس شخص کو بھی گرفتار کرلیا گیا تھا۔