نواز شریف کو بیرون ملک جانے سے روکا جائے: ہائیکورٹ میں درخواست دائر

لاہور (ڈیلی اردو) لاہور ہائیکورٹ میں سابق وزیراعظم نواز شریف کو بیرون ملک جانے سے روکنے کے لئے درخواست دائر کر دی گئی۔

تفصیلات کے مطابق نواز شریف کو بیرون ملک جانے سے روکنے کے لیے درخواست درخواست بیرسٹر جاوید اقبال جعفری نے لاہور ہائیکورٹ میں دائر کی۔

درخواستگزار نے مؤقف اپنایا کہ نواز شریف منی لانڈرنگ میں ملوث رہے ہیں اور ان کے خلاف متعدد مقدمات زیر التواء ہیں۔
درخواست میں کہا گیا کہ سابق وزیراعظم کو بیمار قیدیوں کے برعکس علاج کے لیے بیرون ملک بھجوانا امتیازی سلوک ہے،

وہ حسین حقانی کی طرح بیرون ملک جا کر واپس نہیں آئیں گے۔ نواز شریف نے منی لانڈرنگ کے ذریعے قومی خزانے کو ناقابل تلافی نقصان پہنچایا اور ایمل کانسی کو امریکہ کے سپرد کرنے میں ملوث رہے۔
درخواستگزار نے کہا کہ مسلم لیگ ن کے قائد نواز شریف غیر قانونی طور پر ملکہ برطانیہ سے سر کا خطاب بھی لیا، اس حوالے اور منی لانڈرنگ کے خلاف کیس کے حوالے سے درخواستیں لاہور ہائیکورٹ میں زیرالتواء ہیں۔

درخواستگزار نے استدعا کی کہ نواز شریف کو بیرون ملک جانے کی اجازت درخواست کے فیصلے سے مشروط کی جائے اور عدالتی فیصلہ آنے تک سابق وزیراعظم کو بیرون ملک جانے سے روکنے کا حکم دیا جائے۔