واشنگٹن ڈی سی کے قریب افغان شہری گرفتار، داعش خراسان کی معاونت کے الزامات

واشنگٹن (ش ح ط) امریکہ کے دارالحکومت واشنگٹن ڈی سی کے قریب امریکی محکمہ ہوم لینڈ سیکیورٹی (DHS) اور امیگریشن اینڈ کسٹمز انفورسمنٹ (ICE) نے مشترکہ کارروائی کرتے ہوئے افغان شہری جان شاہ صافی کو گرفتار کیا ہے، جس پر داعش خراسان (ISIS-K) کی معاونت اور افغانستان میں ایک مسلح گروہ کو اسلحہ فراہم کرنے کا الزام ہے۔ 

حکام کے مطابق ملزم امریکا میں اس وقت داخل ہوا جب 2021 کے بعد بڑی تعداد میں افغان شہریوں کو ہنگامی انخلا کے دوران ملک میں آنے کی اجازت دی گئی تھی، اور اس کی مکمل سیکیورٹی جانچ امریکا پہنچنے کے بعد کی گئی۔

ابتدائی تحقیقات اور ملزم کی شناخت، تصویر اور پروفائل کی بنیاد پر ظاہر ہوتا ہے کہ گرفتار شخص سابق افغان صوبائی انٹیلی جنس چیف جنرل جان شاہ صافی سے مشابہت رکھتا ہے، جو کنڑ صوبے میں نیشنل ڈائریکٹوریٹ آف سیکیورٹی (NDS) کے سابق چیف اور ننگرہار میں سابق ڈپٹی انٹیلی جنس چیف رہ چکے ہیں۔

ملزم کے والد، جنداد خان صافی، ایک معروف مخالف طالبان ملیشیا اور سابق جہادی کمانڈر تھے، جن کا قریبی تعلق مرحوم احمد شاہ مسعود سے تھا۔ جنداد خان صافی نے کرزئی دور میں کنڑ کے گورنر کے طور پر بھی خدمات انجام دیں اور بعد ازاں قبائلی بزرگ کے طور پر کام کیا۔ وہ فروری 2022 میں انتقال کر گئے۔

ICE کے مطابق ملزم نے مبینہ طور پر داعش خراسان سے وابستہ افراد کی معاونت کی اور اپنے والد کو اسلحہ فراہم کیا، جس کے ذریعے ممکنہ طور پر افغانستان میں مسلح کارروائیوں کی حمایت کی گئی۔ امریکی حکام نے تصدیق کی ہے کہ مقدمے کی تفصیلی تفتیش جاری ہے۔

اس گرفتاری کے بعد امریکی سیاسی حلقوں میں افغان انخلا پالیسی پر ایک بار پھر بحث شدت اختیار کر گئی ہے، کیونکہ لاکھوں افغان شہری بغیر مکمل جانچ کے امریکا میں داخل ہوئے۔ 

حکام کا کہنا ہے کہ گرفتاری عمل میں آچکی ہے اور کیس سے متعلق مزید حقائق سامنے آنے پر عوام کو آگاہ کیا جائے گا۔