وزیراعلیٰ کے پی محمود خان کا دورہ شمالی وزیرستان، دہشتگردی سے متاثرہ تاجروں میں امدادی چیک تقسیم

میران شاہ (ڈیلی اردو) وزیراعلیٰ خیبر پختونخوا محمود خان نے قبائلی ضلع شمالی وزیرستان کے دہشت گردی سے متاثرہ تاجروں میں امدادی چیک تقسیم کیے۔

محمود خان نے تقریب میں شرکت کی جس میں قبائلی عوام کی قربانیوں کو خراج تحسین پیش کرتے ہوئے انھوں نے 25 تاجروں میں 50 کروڑ روپے کے چیک تقسیم کیے۔

محمود خان نے کہا کہ میران شاہ بازار میں 5654 دکانوں کی تقصانات کے لئے ایک ارب 69 کروڑ روپے مختص کیے گئے ہیں۔

وزیراعلیٰ نے مزید کہا کہ 69 پٹرول پمپوں کے نقصانات کے نقصانات کے ازالے کے لئے 33 کروڑ روپے مختص کیے ہیں۔ انہوں نے کہا کہ میرعلی بازار کے 3707 دکانوں کے لئے دو ارب 80 کروڑ، سو کنال پر ترقیاتی کاموں کے لئے دو ارب 92 کروڑ روپے مختص کیے گئے ہیں۔

انھوں نے کہا کہ تاجروں کے نقصانات کے ازالے کیلئے 2 ارب روپے جاری کیے جا چکے ہیں جبکہ 7 ارب 76 کروڑ روپے مزید مختص کیے گئے ہیں۔

کے پی کے وزیراعلیٰ نے دعویٰ کیا ہے کہ 10 دن میں قبائلی نمائندگان کو وفاقی کابینہ میں بھی شامل کیا جائے گا۔ قبائیلی عوام نے دہشتگردی کے جنگ میں قربانیاں دی ہے۔

سانحہ اے پی ایس کے حوالے سے محمود خان کا کہنا تھا کہ ہم شہداء کے والدین کو خراج تحسین پیش کرتے ہیں اور متاثرہ خاندانوں کے غم میں برابر کے شریک ہیں۔ بچوں کی شہادت ہمیشہ یاد رکھی جائے گی اور ان کی قربانی تاریخ میں رقم ہوگی۔ صوبائی حکومت آزمائش کی گھڑی میں والدین کے ساتھ ہے اور کبھی تنہا نہیں چھوڑیں گے۔