ٹانک : مارٹر گولہ گرنے سے 2 بچے ہلاک ، عوام کا احتجاج

ٹانک (ڈیلی اردو) خیبر پختونخوا کے ضلع ٹانک میں افسوسناک واقعہ پیش آیا جہاں تھانہ گومل کی حدود میں واقع گاؤں رغزائی میں مارٹر گولہ گرنے سے دو کمسن بچے موقع پر ہی ہلاک ہو گئے۔

ہلاک ہونے والے بچوں کی شناخت چھ سالہ عرفات اور شعیب کے ناموں سے ہوئی ہے۔ اہل خانہ کے مطابق دونوں بچے حسب معمول مدرسے جانے کے لیے گھر سے نکلے ہی تھے کہ اچانک مارٹر کا گولہ آ گرا، جس سے وہ موقع پر دم توڑ گئے۔

ریسکیو ٹیموں نے ضروری کارروائی کے بعد لاشوں کو ضلعی ہیڈکوارٹر ہسپتال ٹانک منتقل کیا۔ واقعے کے بعد علاقے میں شدید غم و غصہ دیکھنے میں آیا۔ مشتعل افراد نے لاشوں کے ساتھ کوڑ کے مقام پر مرکزی وانا–جنڈولہ شاہراہ کو بند کرتے ہوئے پرزور احتجاج کیا، جس سے ٹریفک کی روانی معطل ہو گئی۔