ٹانک: شدت پسندوں نے محکمہ زراعت کے ڈپٹی ڈائریکٹر عمران خان وزیر کو اغوا کر لیا

ٹانک (نمائندہ ڈیلی اردو) خیبر پختونخوا کے جنوبی ضلع ٹانک میں محکمہ زراعت جنوبی وزیرستان کے ڈپٹی ڈائریکٹر عمران خان وزیر کو شدت پسندوں نے گزشتہ شب نمازِ عشاء کے بعد اغوا کر لیا ہے۔ واقعہ اس وقت پیش آیا جب وہ مسجد سے باہر نکلے۔

پولیس کے مطابق چار مسلح شدت پسندوں نے عمران وزیر کو بندوق کی نوک پر اغوا کیا اور نامعلوم مقام کی طرف لے گئے۔ اغوا کار جدید اسلحے سے لیس اور نقاب پوش تھے، جنہوں نے انتہائی منظم انداز میں کارروائی کی۔ واقعے کے بعد سیکیورٹی فورسز اور پولیس نے علاقے میں سرچ آپریشن شروع کر دیا ہے۔

پولیس حکام کا کہنا ہے کہ واقعے کی ہر پہلو سے تحقیقات جاری ہیں اور شدت پسندوں کی گرفتاری کے لیے تمام وسائل بروئے کار لائے جا رہے ہیں۔ عینی شاہدین کے مطابق اغوا کار گاڑی میں سوار ہو کر آئے تھے اور چند ہی لمحوں میں عمران وزیر کو ساتھ لے کر فرار ہو گئے۔

واقعے کے بعد علاقے میں خوف و ہراس پھیل گیا ہے اور مقامی افراد میں سخت تشویش پائی جا رہی ہے۔ شہریوں نے حکومت سے مطالبہ کیا ہے کہ عمران خان وزیر کی جلد بازیابی کو یقینی بنایا جائے اور علاقے میں سیکیورٹی کو مزید مؤثر بنایا جائے۔

تاحال کسی گروہ نے اغوا کی ذمہ داری قبول نہیں کی ہے، تاہم حکام کا کہنا ہے کہ علاقے میں سرگرم شدت پسند گروہوں کے کردار کو بھی خارج از امکان قرار نہیں دیا جا سکتا۔