ٹانک: نامعلوم افراد نے اسسٹنٹ کمشنر ریاض خان سمیت 4 افراد کو اغوا کر لیا

ڈیرہ اسماعیل خان (ڈیلی اردو) اسسٹنٹ کمشنر ایف بی آر ریاض خان کو 4 ساتھیوں سمیت ٹانک میں اغوا کرلیا گیا۔

تفصیلات کے مطابق خیبر پختونخوا کے ضلع ٹانک کے علاقے سے اسسٹنٹ کمشنر کو نامعلوم افراد نے اغوا کر لیا ہے۔ پولیس کے مطابق واقعہ گزشتہ رات تھانہ گومل کی حدود میں کوٹ مرتضی کے علاقے میں پیش آیا ہے جہاں اغوا کاروں نے رات کی تاریکی میں ریاض خان کو اسلحے کے زور پر اغوا کیا۔

پولیس کے مطابق اغوا کار فوجی یونیفارم میں ملبوس تھے جو ریاض خان کے حجرہ میں داخل ہوئے اور انکو اغوا کرلیا۔

پولیس کے مطابق ریاض خان ماں کی فوتگی کے سلسلے میں گاوں آئے تھے۔

پولیس نے بتایا کہ ریاض خان کے ہمراہ اغوا ہونے والوں میں ممتاز ،مدثر اور صدام بھی شامل ہیں جوکہ ریاض خان کے قریبی رشتہ دار ہیں۔