ٹرمپ کی ایران کو سخت دھمکی، جوابی کارروائی پر مزید شدید حملوں کا انتباہ

واشنگٹن(ڈیلی اردو) امریکی صدر ڈونلڈ ٹرمپ نے ایران کو خبردار کیا ہے کہ اگر تہران نے حالیہ امریکی حملوں کا جواب دیا تو امریکا مزید طاقتور کارروائی کرے گا۔

ٹرمپ نے اپنے سوشل میڈیا اکاؤنٹ پر بیان میں امریکی حملوں کو ’’جائز‘‘ قرار دیتے ہوئے کہا کہ کارروائی ایران کی جانب سے آبنائے ہرمز میں سمندری بارودی سرنگیں بچھانے کی مبینہ کوشش اور اردن میں امریکی فوجی تنصیبات کی جانب آٹھ میزائل داغے جانے کے ردعمل میں کی گئی۔

امریکی سینٹرل کمانڈ کے مطابق امریکی افواج نے ایران میں پاسداران انقلاب سے منسلک بعض اہداف کو نشانہ بنایا۔ امریکی حکام کا کہنا ہے کہ کارروائی کا مقصد آبنائے ہرمز میں تجارتی جہازوں اور خطے میں موجود امریکی اہلکاروں کو درپیش خطرات کا مقابلہ کرنا تھا۔

ٹرمپ نے کہا کہ اگر ایران نے حملوں کا جواب دیا تو امریکا پہلے سے زیادہ شدت کے ساتھ کارروائی کرے گا، تاہم ان کے بقول یہ ممکنہ کارروائی بھی واشنگٹن کی جانب سے کیا جانے والا سب سے بڑا حملہ نہیں ہوگی۔

حالیہ کشیدگی میں آبنائے ہرمز مرکزی حیثیت اختیار کر گیا ہے، جہاں عالمی تجارت اور توانائی کی ترسیل کے لیے اہم سمندری راستہ موجود ہے۔ امریکی مؤقف کے مطابق واشنگٹن اس راستے میں جہاز رانی کو محفوظ بنانے اور مبینہ بارودی سرنگوں کے خطرے کو روکنے کی کوشش کر رہا ہے۔

اس سے قبل امریکا نے آبنائے ہرمز کے قریب جزیرہ لارک میں ایران کے دو میزائل لانچنگ مقامات کو بھی نشانہ بنایا تھا۔ امریکی حکام کے مطابق وہاں موجود پاسداران انقلاب کے اہلکار سمندری راستے میں بارودی سرنگیں بچھانے کی تیاری کر رہے تھے۔

ایران نے اس کارروائی کے ردعمل میں اردن میں امریکی موجودگی والی دو تنصیبات کی جانب میزائل داغنے کا دعویٰ کیا، جبکہ اردن نے اپنی فضائی حدود میں داخل ہونے والے آٹھ میزائلوں کو روکنے کا اعلان کیا تھا۔

امریکی اور ایرانی اقدامات کے بعد خطے میں کشیدگی میں اضافے کے خدشات بڑھ گئے ہیں، جبکہ آبنائے ہرمز میں بحری آمدورفت اور عالمی توانائی کی فراہمی پر ممکنہ اثرات بھی توجہ کا مرکز بن گئے ہیں۔