پاکستان نے افغانستان میں ٹی ٹی پی کے خلاف پھر کارروائی کا عندیہ دے دیا

واشنگٹن (ش ح ط) اقوام متحدہ میں پاکستان کے مستقل مندوب عاصم افتخار نے افغانستان میں موجود کالعدم تحریک طالبان پاکستان (ٹی ٹی پی) کے خلاف کارروائی کا عندیہ دیا ہے۔

عاصم افتخار نے کہا کہ افغانستان میں تقریباً 6 ہزار ٹی ٹی پی جنگجو موجود ہیں۔ اگر طالبان حکومت نے ان کے خلاف کارروائی نہ کی تو پاکستان اپنے تحفظ کے لیے اقدامات کرے گا۔

انہوں نے مزید کہا کہ افغانستان پھر سے دہشت گرد گروہوں اور ان کے پراکسی عناصر کی پناہ گاہ بن چکا ہے اور افغان سرزمین سے ہونے والی دہشت گردی پاکستان کے لیے سنگین خطرہ ہے۔ ان کے مطابق ٹھوس شواہد موجود ہیں کہ افغانستان میں دہشت گرد گروہ ایک دوسرے کے ساتھ تعاون کر رہے ہیں۔

پاکستان کے مستقل مندوب نے بتایا کہ ملک نے دراندازی کی متعدد کوششوں کو ناکام بنایا ہے اور ہماری بہادر فورسز اور عام شہریوں نے اس کے لیے بڑی قربانیاں دی ہیں۔ اقوام متحدہ کی ٹیم نے بھی ٹی ٹی پی کی افغان سرزمین پر موجودگی کی تصدیق کی ہے۔

عاصم افتخار کا کہنا تھا کہ افغانستان کی موجودہ صورتحال کے تباہ کن نتائج خطے پر اثر ڈال رہے ہیں، جنگ ختم ہو چکی ہے، اور افغان مہاجرین کو اپنے وطن واپس جانا چاہیے۔

انہوں نے مزید کہا کہ پاکستان نے افغانستان سے ٹی ٹی پی اور بی ایل اے دہشت گردوں کی متعدد دراندازی کی کوششوں کو ناکام بنایا اور بین الاقوامی افواج کی جانب سے افغانستان میں چھوڑے گئے جدید فوجی ساز و سامان کو ضبط کیا۔ 

انہوں نے زور دیا کہ طالبان کی صفوں میں موجود عناصر ان دہشت گرد گروہوں کی حمایت کر رہے ہیں اور انہیں آزادانہ کارروائی کی اجازت دے رہے ہیں، جبکہ دہشت گرد گروہوں کے درمیان مشترکہ تربیت، ہتھیاروں کی خرید و فروخت، اور افغان سرزمین سے پاکستان کے خلاف ہم آہنگ حملوں کے ٹھوس شواہد موجود ہیں۔

پاکستان کے موقف کے مطابق، افغان سرزمین پر دہشت گرد گروہوں کی موجودگی خطے کے امن کے لیے سنگین خطرہ ہے اور اس پر فوری توجہ دی جانی چاہیے۔