پاکستان نے بھارت کے سات نئے خوبصورت طیارے مار گرائے، امریکی صدر ٹرمپ

ٹوکیو (ڈیلی اردو) امریکی صدر ڈونلڈ ٹرمپ نے ایک بار پھر پاکستان اور انڈیا کے درمیان ممکنہ جنگ رکوانے کے اپنے کردار کا ذکر کرتے ہوئے کہا کہ اس دوران سات بالکل نئے خوبصورت طیارے مار گرائے گئے۔

ٹرمپ نے منگل کو جاپان میں کاروباری شخصیات کے ساتھ عشائیے میں خطاب کرتے ہوئے بتایا کہ انہوں نے تجارت اور ٹیرف کے ذریعے جنگیں ختم کروائی ہیں۔

ان کا کہنا تھا: ’’اگر آپ انڈیا اور پاکستان کو دیکھیں تو وہ لڑ رہے تھے، سات طیارے مار گرائے گئے، سات بالکل نئے خوبصورت طیارے مار گرائے گئے اور دو بڑی ایٹمی طاقتیں لڑ رہی تھیں۔‘‘

امریکی صدر نے دعویٰ کیا کہ انہوں نے وزیر اعظم نریندر مودی اور پاکستان کے آرمی چیف عاصم منیر سے کہا کہ لڑائی بند کر دیں ورنہ امریکہ ان کے ساتھ تجارت نہیں کرے گا۔

ٹرمپ نے مزید کہا کہ تقریباً 24 گھنٹوں کے اندر صورتحال ختم ہو گئی اور یہ ان کے نزدیک ایک حیرت انگیز واقعہ تھا۔

خیال رہے کہ پاکستان مئی میں انڈیا کے ساتھ جنگ رکوانے میں ٹرمپ کے کردار کا اعتراف کرتا آیا ہے اور امریکی صدر کو نوبل امن انعام کے لیے نامزد کرنے کی تجویز بھی دی گئی تھی۔ تاہم، انڈیا مسلسل دعویٰ کرتا رہا ہے کہ جنگ کے خاتمے کا فیصلہ دونوں ممالک کی براہِ راست سفارتکاری کے ذریعے ہوا اور اس میں کوئی تیسرا فریق شامل نہیں تھا۔