پاکستان کی سکھوں کے مقدس مقام گولڈن ٹیمپل کو نشانہ بنانے کے الزام کی سخت تردید

اسلام آباد (ڈیلی اردو) پاکستان نے انڈین فوج کے اس دعوے کو سختی سے مسترد کر دیا ہے جس میں کہا گیا تھا کہ پاکستان نے آٹھ مئی کو سکھوں کے مقدس مذہبی مقام، گولڈن ٹیمپل (در بار صاحب، امرتسر) کو ڈرونز اور میزائلوں کے ذریعے نشانہ بنانے کی کوشش کی تھی۔

دفترِ خارجہ کے ترجمان نے انڈین فوج کے اس بیان پر شدید ردعمل دیتے ہوئے کہا ہے کہ پاکستان کسی بھی مذہب کے مقدس مقامات کے خلاف کارروائی کا تصور بھی نہیں کر سکتا۔ ترجمان کے مطابق: “ہم اس الزام کو قطعی طور پر مسترد کرتے ہیں۔ پاکستان تمام مذاہب اور ان کی عبادت گاہوں کا احترام کرتا ہے۔ گولڈن ٹیمپل جیسے مقدس مقام کو نشانہ بنانے کا دعویٰ سراسر بے بنیاد اور گمراہ کن ہے۔”

دفترِ خارجہ نے انکشاف کیا کہ درحقیقت 6 اور 7 مئی کی درمیانی شب انڈیا نے خود پاکستان کے مختلف مذہبی مقامات کو نشانہ بنایا، اور اب یہ جھوٹے الزامات اسی حملے سے توجہ ہٹانے کی کوشش ہیں۔

ترجمان نے مزید کہا کہ پاکستان سکھ مذہب کے کئی مقدس مقامات، جیسے ننکانہ صاحب اور کرتارپور، کا فخر سے محافظ ہے اور ہر سال ہزاروں سکھ یاتری بغیر ویزا کرتارپور راہداری کے ذریعے یہاں آتے ہیں۔

ادھر انڈین فوج کی 15ویں انفنٹری ڈویژن کے میجر جنرل کارتک سی شیشادری نے دعویٰ کیا ہے کہ انڈین ایئر ڈیفنس سسٹم نے حملے کو ناکام بنایا۔ ان کے مطابق، 7 مئی کو انڈیا نے پاکستان میں مبینہ دہشت گردوں کے ٹھکانوں کو نشانہ بنانے کے بعد الرٹ جاری کیا تھا، اور انٹیلیجنس اطلاعات کے مطابق گولڈن ٹیمپل بھی ممکنہ اہداف میں شامل تھا۔

ماضی میں بھی انڈیا کی جانب سے ایسے الزامات لگتے رہے ہیں جنہیں پاکستان نے ہمیشہ سختی سے رد کیا ہے، تاہم موجودہ الزام ایک مقدس مذہبی مقام سے متعلق ہونے کے سبب خاصی حساسیت اختیار کر گیا ہے۔

پاکستانی تجزیہ کاروں کے مطابق انڈیا کی جانب سے مذہبی مقامات کے حوالے سے ایسے دعوے خطے میں کشیدگی کو مزید ہوا دے سکتے ہیں، جس کے سنگین نتائج برآمد ہو سکتے ہیں۔