پاکستان کے وزیر خارجہ کا بنگلہ دیش کا 13 سال بعد دورہ

ڈھاکہ +اسلام آباد  (ڈیلی اردو/ اے پی پی) پاکستان کے نائب وزیر اعظم اور وزیر خارجہ اسحاق ڈار بنگلہ دیش کی حکومت کی دعوت پر دو روزہ سرکاری دورے پر ڈھاکہ پہنچ گئے ہیں۔ یہ دورہ پاکستان اور بنگلہ دیش کے درمیان تعلقات میں ایک اہم سنگ میل ہے کیونکہ 13 سال بعد پاکستان کے وزیر خارجہ بنگلہ دیش کا دورہ کر رہے ہیں۔

دفتر خارجہ کے مطابق اس دورے کے دوران اسحاق ڈار بنگلہ دیشی قیادت سے ملاقاتیں کریں گے جن میں چیف ایڈوائزر پروفیسر محمد یونس، مشیر برائے امور خارجہ توحید حسین اور مشیر تجارت ایس کے بشیر الدین شامل ہیں۔ ملاقاتوں میں باہمی دلچسپی کے علاقائی اور بین الاقوامی امور سمیت دوطرفہ تعاون کے تمام پہلوؤں پر بات چیت کی جائے گی۔

بنگلہ دیش کے شاہ جلال انٹرنیشنل ایئرپورٹ پر نائب وزیر اعظم کا استقبال سیکرٹری خارجہ اور دیگر حکام نے کیا۔

خیال رہے کہ ایک روز قبل وفاقی وزیر تجارت جام کمال خان نے بنگلہ دیش کے دورے کے دوران مشیر برائے تجارت ایس کے بشیر الدین سے ملاقات کی تھی، جس میں اقتصادی تعاون، باہمی سرمایہ کاری اور دو طرفہ تجارتی تعلقات کو مضبوط بنانے پر بات چیت ہوئی۔ دونوں ممالک نے تجارتی تعلقات میں مزید تعاون کے لیے ایک مشترکہ ورکنگ گروپ کے قیام پر بھی اتفاق کیا ہے۔