پاکستانی سیکیورٹی فورسز کے آپریشنز میں 19 دہشت گرد ہلاک

راولپنڈی (ک م )  پاکستانی سیکیورٹی فورسز نے خیبر پختونخوا کے تین اضلاع شمالی وزیرستان، مہمند اور بنوں میں 9 اور 10 ستمبر کو انٹیلی جنس کی بنیاد پر کیے گئے آپریشنز کے دوران کالعدم تحریک طالبان پاکستان (ٹی ٹی پی) سے تعلق رکھنے والے 19 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق، مہمند کے علاقے گلونو میں انٹیلی جنس بنیاد پر کیے گئے آپریشن کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس میں 14 دہشت گرد ہلاک ہو گئے۔

ادھر شمالی وزیرستان کے علاقے دتہ خیل میں خفیہ اطلاع پر کارروائی کے دوران فورسز نے 4 دہشت گردوں کو مار گرایا، جبکہ بنوں میں ہونے والے ایک اور آپریشن میں ایک دہشت گرد ہلاک کیا گیا۔

بیان میں کہا گیا ہے کہ کارروائیوں کے دوران اسلحہ اور گولہ بارود بھی برآمد کیا گیا۔ مارے جانے والے دہشت گرد علاقے میں دہشت گردی کی متعدد کارروائیوں میں ملوث تھے۔

آئی ایس پی آر کے مطابق، ممکنہ مزید دہشت گردوں کی موجودگی کے پیش نظر کلیئرنس اور سینیٹائزیشن آپریشن جاری ہیں۔ سیکیورٹی فورسز نے واضح کیا ہے کہ وہ پاکستان سے دہشت گردی کے مکمل خاتمے کے لیے پرعزم ہیں۔