پاکستانی وزیراعظم کی قطر کے امیر سے ملاقات، اسرائیلی جارحیت پر تشویش کا اظہار

دوحہ/اسلام آباد (ڈیلی اردو) وزیراعظم پاکستان شہباز شریف نے قطر کے امیر شیخ تمیم بن حماد الثانی سے ملاقات کے دوران دوحہ پر اسرائیلی حملے کی شدید مذمت کرتے ہوئے کہا ہے کہ ’’امت کو اسرائیلی اشتعال انگیزیوں کے مقابلے میں اپنی صفوں میں اتحاد پیدا کرنے کی ضرورت ہے۔‘‘

وزیراعظم جمعرات کو اعلیٰ سطحی وفد کے ہمراہ دوحہ پہنچے جہاں انھوں نے قطری قیادت سے ملاقات کی۔ وفد میں نائب وزیراعظم و وزیرِ خارجہ اسحاق ڈار، وزیرِ دفاع خواجہ آصف، وزیرِ اطلاعات و نشریات عطاء اللہ تارڑ اور معاون خصوصی طارق فاطمی بھی شامل تھے۔

وزیراعظم ہاؤس کے مطابق شہباز شریف نے اسرائیلی فضائی حملے کو قطر کی خودمختاری اور علاقائی سالمیت کی ’’کھلم کھلا خلاف ورزی‘‘ قرار دیتے ہوئے قطری قیادت کو پاکستان کی ’’مکمل یکجہتی اور حمایت‘‘ کا یقین دلایا۔

قطری امیر شیخ تمیم بن حماد الثانی نے وزیراعظم پاکستان کا شکریہ ادا کیا اور کہا کہ دوحہ کا یہ دورہ مشکل گھڑی میں قطر کے عوام اور حکومت کے ساتھ پاکستان کے یکجہتی کے جذبے کو ظاہر کرتا ہے۔

یاد رہے کہ منگل کو اسرائیل نے قطر کے دارالحکومت دوحہ میں ایک عمارت پر فضائی حملہ کیا تھا، جس کے بارے میں اسرائیلی فوج کا دعویٰ ہے کہ اس میں ’’7 اکتوبر کے حملوں کے ماسٹر مائنڈز‘‘ کو نشانہ بنایا گیا۔

حماس کے مطابق اس کا مذاکراتی وفد اس حملے میں محفوظ رہا تاہم تنظیم نے اپنے پانچ دیگر ارکان کی ہلاکت کی تصدیق کی۔ قطری حکام نے بھی ایک سکیورٹی اہلکار سمیت چھ افراد کے مارے جانے کی اطلاع دی۔

قطر کے وزیراعظم محمد بن عبدالرحمن بن جاسم الثانی نے اس حملے کو ’’ریاستی دہشتگردی‘‘ قرار دیا ہے۔

پاکستان سمیت کئی ممالک نے دوحہ پر اسرائیلی حملے کی شدید الفاظ میں مذمت کی اور اسے بین الاقوامی قوانین کی خلاف ورزی قرار دیا ہے۔