پشاور سے متصل علاقوں میں پولیس، سیکیورٹی فورسز نے دہشت گردوں کے 3 حملے ناکام بنا دیے

پشاور (ڈیلی اردو) صوبہ خیبر پختونخوا کے صوبائی دارالحکومت پشاور سے 50 کلومیٹر جنوب میں ضلع کوہاٹ سے متصل علاقے میں واقع مٹانی پولیس اسٹیشن کی حدود میں رات گئے دہشت گردوں کے حملے کی 3 کوششوں کو پولیس اور سیکیورٹی فورسز نے ناکام بنادیا۔

تفصیلات کے مطابق پولیس حکام نے بتایا کہ جدید ترین ہتھیاروں سے لیس دہشت گردوں نے قریبی جنگل سے حمید خان پولیس چوکی پر حملہ کیا، تاہم دہشت گرد پولیس چوکی کو نشانہ نہیں بنا سکے کیونکہ وہ دور سے فائرنگ کر رہے تھے۔

انہوں نے مزید بتایا کہ اہلکاروں نے جوابی فائرنگ کرتے ہوئے حملے کو ناکام بنا دیا، اس دوران کوئی جانی نقصان نہیں ہوا۔

دریں اثنا فورٹ میکسن (جسے کشنگر پوسٹ بھی کہا جاتا ہے) پر بھی اسی طرح کے حملے میں دہشت گردوں نے دور سے فائرنگ کی تاہم اس حملے کو بھی ناکام بنا دیا گیا۔

تیسرا حملہ دہشت گردوں نے ازاخیل ڈیم پوسٹ پر کیا جسے سیکیورٹی اہلکاروں نے جوابی فائرنگ کرکے ناکام بنا دیا۔

ایس پی صدر ڈویژن ملک حبیب نے نجی ٹی دی چینل ڈان کو بتایا کہ دہشت گردوں نے دور سے 3 چوکیوں اور ان مقامات پر فائرنگ کی جہاں فوجی اہلکار تعینات تھے۔

انہوں نے مزید کہا کہ صبح سویرے علاقے میں سرچ آپریشن کے دوران 8 مشتبہ افراد کو حراست میں لے لیا گیا۔

انہوں نے کہا کہ دہشت گردوں کے خلاف مقدمات کے اندراج کے لیے پولیس کے محکمہِ انسداد دہشت گردی کو باضابطہ پیغام بھیج دیا گیا ہے۔