پشاور میں سیکیورٹی فورسز کے آپریشن میں ٹی ٹی پی کے شیڈو گورنر سمیت 3، سی ٹی ڈی اور فوج کے 4 اہلکار ہلاک

اسلام آباد (ش ح ط) صوبہ خیبر پختونخوا کے صوبائی حکومت پشاور کے نواحی علاقے میں سیکیورٹی فورسز، سی ٹی ڈی اور پولیس کے مشترکہ آپریشن میں کالعدم تحریک طالبان پاکستان (ٹی ٹی پی) کے شیڈو گورنر کمانڈر عبدالرحیم 2 ساتھیوں سمیت ہلاک ہوگیا۔

پاکستانی فوج کے شعبہ تعلقات عامہ (آئی ایس پی آر) کے مطابق بدھ کے دن پشاور کے حسن خیل علاقے میں انٹیلیجنس کی بنیاد پر کیے جانے والے ایک آپریشن میں ایک ہائی ویلیو کمانڈر سمیت تین دہشت گرد جبکہ سی ٹی ڈی خیبر پختونخوا اور فوج کے چار اہلکار ہلاک ہوئے۔

آئی ایس پی آر کی جانب سے جاری اعلامیے میں کہا گیا ہے کہ ایک ہائی پروفائل دہشت گرد کی موجودگی کی اطلاع پر کارروائی کی گئی جس کے دوران فائرنگ کے تبادلے میں ہائی ویلیو ٹارگٹ عبدالرحیم نامی کمانڈر سمیت تین دہشت گرد ہلاک ہوئے جن سے اسلحہ اور ایمونیشن بھی برآمد ہوا۔

آئی ایس پی آر نے دعوی کیا ہے کہ عبدالرحیم قانون نافذ کرنے والے اداروں کو مطلوب تھا جس کی گرفتاری پر 60 لاکھ روپے کی انعامی رقم بھی رکھی گئی تھی۔ اعلامیے کے مطابق عبدالرحیم نامی کمانڈر چھبیس مئی کو کیپٹن حسین جہانگیر اور حولدار شفیق اللہ کی ہلاکت کا بھی ذمہ دار تھا۔

آئی ایس پی آر کے مطابق اس آپریشن کے دوران انسداد دہشت گردی خیبر پختونخوا کے سب انسپکٹر تاجمیر شاہ اور اسسٹنٹ سب انسپکٹر محمد اکرم سمیت دو فوجی
سپاہی محمد ادریس اور سپاہی بدام گل بھی ہلاک ہو گئے۔

حکام کے مطابق آپریشن میں 3 پولیس اہلکار معمولی زخمی ہوئے جو زیر علاج ہیں۔

آئی ایس پی آر نے کہا کہ پاکستان کی سیکیورٹی فورسز ملک بھر میں امن و استحکام کو یقینی بنانے کے لیے دیگر قانون نافذ کرنے والے اداروں کے ساتھ کندھے سے کندھا ملا کر کھڑی ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔

واضح رہے گزشتہ دنوں یہ بات رپورٹ سامنے آئی تھی کہ خیبرپختونخوا میں عسکریت پسند صوبے کے مختلف اضلاع میں پھیلتے جارہے ہیں جس کی وجہ سے گزشتہ ماہ صوبے کے کے 9 اضلاع میں دہشت گردی کے حملے ہوئے۔

اسلام آباد میں قائم تھنک ٹینک پاکستان انسٹی ٹیوٹ فار پیس سٹڈیز (پی آئی پی ایس) کی جانب سے جاری کردہ رپورٹ میں جون میں پاکستان میں 27 دہشت گرد حملے ریکارڈ کیے گئے، ان حملوں میں سے 21 خیبرپختونخوا اور 6 بلوچستان میں رپورٹ ہوئے، جب کہ پچھلے ماہ ان حملوں کی تعداد 36 تھی۔

خیبرپختونخوا میں سیکیورٹی فورسز کے اہلکاروں پر حملے عسکریت پسند گروپوں کا سب سے بڑا ہدف رہے ہیں، حالیہ ہفتوں کے دوران تعلیمی ادارے، خاص طور پر لڑکیوں کے اسکول، پولیو کارکنان، قبائلی عمائدین اور سیاسی رہنما ان حملوں کی زد میں آئے ہیں۔

پی آئی پی ایس نے جون کے لیے اپنی ماہانہ سیکیورٹی جائزے رپورٹ میں بتایا کہ جون میں کالعدم تنظیم تحریک طالبان پاکستان اور دیگر مقامی طالبان گروپوں نے خیبرپختونخوا میں 21 دہشت گرد حملوں کی ذمہ داری قبول کی، اور یہ تعداد پچھلے مہینے کے مقابلے میں دو زیادہ ہیں۔

ان حملوں میں 28 افراد ہلاک ہوئے، جن میں 19 سیکیورٹی اور قانون نافذ کرنے والے اہلکار بھی شامل تھے۔

جون 2024 کے دوران، بلوچستان میں دہشت گردی کے کل 6 واقعات ہوئے، جن میں سیکیورٹی اور قانون نافذ کرنے والے اداروں کے اہلکاروں سمیت 4 افراد ہلاک، 14 افراد زخمی ہوئے۔

رپورٹ کے مطابق سیکورٹی فورسز اور انسداد دہشت گردی کے محکموں کی پولیس نے جون میں مبینہ دہشت گردوں کے خلاف 5 کارروائیاں کیں، پچھلے مہینے میں یہ تعداد 10 تھی، ان کارروائیوں میں 17 دہشت گرد مارے گئے، اور 3 زخمی ہوئے۔

رپورٹ کردہ 5 میں سے 4 آپریشن خیبرپختونخوا کے اضلاع بنوں اور لکی مروت میں ہوئے، جب کہ ایک آپریشن کراچی میں کیا گیا۔