پشاور میں نامعلوم افراد کی فائرنگ سے پولیس افسر ہلاک

پشاور (ڈیلی اردو) صوبہ خیبر پختونخوا کے دارالحکومت پشاور کے تھانہ سربند کی حدود میں فائرنگ سے ایک پولیس افسر ہلاک ہوگیا ہے۔

تفصیلات کے مطابق اسسٹنٹ سب انسپکٹر (اے ایس آئی) حاجی اکبر تھانہ حیات آباد میں تعینات تھا، پولیس افسر موٹر سائیکل پر ڈیوٹی کے لیے جارہا تھا کہ نامعلوم حملہ آور نے فائرنگ کردی۔

فائرنگ کے نتیجے میں پولیس افسر موقع پر ہی دم توڑ گیا جبکہ ایک راہگیر زخمی بھی ہوا۔

بعد ازاں پولیس افسر کی نماز جنازہ ادا کردی گئی جس میں انسپکٹر جنرل (آئی جی) خیبر پختونخوا اختر حیات، سی سی پی او سید اشفاق انور سمیت دیگر حکام اور لواحقین نے شرکت کی۔

پولیس کےمطابق جائے وقوع سے 30 بور کے 10 خول ملے ہیں، پولیس نے شواہد اکھٹے کرکے تفتیش شروع کردی ہے جب کہ ملزمان کی گرفتاری کے لیے علاقے میں سرچ آپریشن بھی کیا گیا۔